ព័ត៌មានអន្ដរជាតិ

រុស្ស៊ី អាចផលិតវ៉ាក់សាំងកម្ចាត់វីរុសបំប្លែងខ្លួន Omicron ត្រឹម ៤៥ ថ្ងៃ

បានផុស

២ years មុន

នៅ

ថ្ងៃអង្គារ ៣០ វិច្ឆិកា ២០២១

ដោយ

មូលនិធិវិនិយោគផ្ទាល់របស់រុស្សី (RDIF) បាននិយាយកាលពីថ្ងៃចន្ទថា កំណែថ្មីនៃវ៉ាក់សាំងកូវីដ Sputnik V ដែលប្រើសម្រាប់កម្ចាត់វីរុសបំប្លែងខ្លួន Omicron កំពុងតែស្ថិតក្នុងការអភិវឌ្ឍន៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

RDIF បានរៀបរាប់ថា វ៉ាក់សាំង Sputnik V និង Sputnik Light បានបង្ហាញឲ្យឃើញនូវប្រសិទ្ធភាពខ្ពស់ប្រឆាំងនឹងវីរុសបំប្លែងខ្លួនទាំងអស់នៃមេរោគ SARC-Cov-2 ដែលកំពុងអុកឡុកពិភពលោករហូតមកដល់បច្ចុប្បន្ននេះ ។

RDIF បាននិយាយនៅក្នុងសេចក្តីថ្លែងការណ៍មួយថា “ទោះជាយ៉ាងណាក៏ដោយវិទ្យាស្ថាន Gamaleya ដោយផ្អែកលើពិធីសារដែលមានស្រាប់នៃការបង្កើតវ៉ាក់សាំងសម្រាប់កម្ចាត់វីរុសគួរឲ្យព្រួយបារម្ភមួយនេះ បានចាប់ផ្តើមអភិវឌ្ឍវ៉ាក់សាំង Sputnik កំណែថ្មីសម្រាប់វីរុស Omicron រួចហើយ” ។

ទន្ទឹមនោះលោក Kirill Dmitriev នាយកប្រតិបត្តិ RDIF បាននិយាយថា “វ៉ាក់សាំងកំណែថ្មី Sputnik Omicron អាចរួចរាល់សម្រាប់ការផលិតទ្រង់ទ្រាយធំក្នុងរយៈពេល ៤៥ ថ្ងៃ ។ វ៉ាក់សាំង Sputnik Omicron ជាច្រើនរយលានដូសអាចត្រូវបានផ្តល់ជូនទីផ្សារអន្តរជាតិត្រឹមថ្ងៃទី ២០ ខែកុម្ភៈ ឆ្នាំ ២០២២ ហើយនឹងមានជាង ៣ ពាន់លានដូសពេញឆ្នាំ ២០២២ ។

គួរបញ្ជាក់ថា អង្គការសុខភាពពិភពលោក (WHO) បានដាក់ស្លាកវីរុសបំប្លែងខ្លួនថ្មី Omicron ដែលកំណត់អត្តសញ្ញាណដំបូងនៅអាហ្វ្រិកខាងត្បូងថាជា “វីរុសបំប្លែងខ្លួនគួរឲ្យព្រួយបារម្ភ” ។ មេរោគថ្មីនេះត្រូវបានគេរាយការណ៍ថាមានការវិវត្តចំនួន ៣២ ដែលអាចធ្វើឲ្យវាឆ្លងកាន់តែខ្លាំង និងកាន់តែមានគ្រោះថ្នាក់ ៕