អ្នកវិទ្យាសាស្រ្ត រកឃើញអំប្រ៊ីយ៉ុងដាយណូស័រ អាយុកាល៦៦លានឆ្នាំ ហៀបនឹងញាស់

ក្រុមអ្នកវិទ្យាសាស្ត្រ បានប្រកាសពីការរកឃើញអំប្រ៊ីយ៉ុងដាយណូស័រ ដែលត្រូវបានរក្សាទុកយ៉ាងល្អឥតខ្ចោះ ហើយហៀបនឹងញាស់ចេញពីពងរបស់វា ដូចទៅនឹងកូនមាន់ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំប្រ៊ីយ៉ុងនេះ ត្រូវបានគេរកឃើញនៅទីក្រុង Ganzhou ភាគខាងត្បូងប្រទេសចិន ហើយអ្នកស្រាវជ្រាវប៉ាន់ស្មានថា វាមានអាយុកាលយ៉ាងតិច ៦៦លានឆ្នាំ។

គេជឿថា វាជាដាយណូស័រ Theropod គ្មានធ្មេញ ឬ Oviraptorosaur ហើយត្រូវបានគេដាក់ឈ្មោះឲ្យថា Baby Yingliang។

អ្នកស្រាវជ្រាវ Fion Waisum Ma បាននិយាយថា នេះគឺជាអំប្រ៊ីយ៉ុងដាយណូស័រដ៏ល្អបំផុត ដែលមិនធ្លាប់មានទាល់តែសោះក្នុងប្រវត្តិសាស្ត្រ។

ការរកឃើញនេះ ក៏បានផ្តល់ឲ្យអ្នកស្រាវជ្រាវនូវការយល់ដឹងកាន់តែច្រើនផងដែរ អំពីទំនាក់ទំនងរវាងដាយណូស័រ និងសត្វស្លាបសម័យទំនើប។

Oviraptorosaurs គឺជាដាយណូស័រមានរោម ដែលរស់នៅក្នុងតំបន់អាស៊ី និងអាមេរិកខាងជើងក្នុងអំឡុងចុងសម័យកាល Cretaceous ចន្លោះពី១០០លានទៅ ៦៦លានឆ្នាំមុន។

សាស្ត្រាចារ្យ Steve Brusatte ដែលជាអ្នកជំនាញខាងបុរាណវិទ្យា និងជាផ្នែកមួយនៃក្រុមស្រាវជ្រាវនេះ បានបង្ហោះសារថា វាគឺជាហ្វូស៊ីលដាយណូស័រដ៏អស្ចារ្យបំផុតមួយ ដែលលោកមិនធ្លាប់ឃើញទាល់តែសោះ ហើយអំប្រ៊ីយ៉ុងនេះ គឺជិតដល់ពេលញាស់។

គួរបញ្ជាក់ថា Baby Yingliang មានប្រវែង ២៧សង់ទីម៉ែត្រ ពីក្បាលដល់កន្ទុយ ហើយស្ថិតនៅក្នុងពងស៊ុត៦.៧អ៊ីញនៅឯសារមន្ទីរ Yingliang Stone Nature History ក្នុងប្រទេសចិន។

ស៊ុត​នេះ​ត្រូវ​បាន​គេ​ប្រទះ​ឃើញ​ដំបូង​ក្នុង​ឆ្នាំ ២០០០ ប៉ុន្តែ​ត្រូវ​បាន​ទុកដាក់អស់​រយៈពេល ១០ ឆ្នាំមកហើយ៕

ប្រែសម្រួល៖ Vann Vann

ប្រភព៖ BBC