ពេលនេះ ថៃ បង្ហាញស្ថានភាពអ្នកជំងឺ អូមីក្រុង នៅក្នុងប្រទេសរបស់ខ្លួនហើយ

ប្រធាននាយកដ្ឋានជំងឺផ្លូវដង្ហើម និងរបេងនៅមន្ទីរពេទ្យ Siriraj និយាយថា ភាគច្រើននៃការឆ្លងវីរុសកូវីដ១៩បំប្លែងខ្លួន អូមីក្រុង នៅក្នុងប្រទេសថៃគឺស្រាល ឬមិនមានរោគសញ្ញាទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោកវេជ្ជបណ្ឌិត Nithipat Jearakul បានព្រមានអំពីការកើនឡើងនៃករណីឆ្លង។ នេះបើយោងតាមរបាយការណ៍របស់កាសែត Nation Thailand។

គិតមកទល់នឹងពេលនេះ ការឆ្លងវីរុសអូមីក្រុង ប្រហែល២០០ករណី​ ត្រូវបានបញ្ជាក់នៅក្នុងប្រទេសថៃ ប៉ុន្តែលោក Nithipat និយាយថា យើងនឹងឃើញករណីកើនឡើងក្នុងពេលឆាប់ៗនេះ ជាពិសេសនៅដើមឆ្នាំថ្មី។

យោងតាមលោកវេជ្ជបណ្ឌិត គិតត្រឹមថ្ងៃទី១៩ខែធ្នូ មានតែប្រហែល៣%ប៉ុណ្ណោះនៃការឆ្លង ដែលត្រូវបានបញ្ជាក់ថាជាវីរុស អូមីក្រុង។ យ៉ាងណាក្តី លោក​លើកឡើងថា ​ភាគរយដ៏​ទាបនេះ ​ត្រូវ​បាន​គេ​ព្យាករ​ថា​នឹង​កើន​ឡើង​ក្នុង​ពេល​ឆាប់ៗ​។ ករណីឆ្លងប៉ុនណា គឺនឹងអាស្រ័យលើការគ្រប់គ្រងបានល្អកម្រិតណា ក្នុងអំឡុងពេលឆ្លងឆ្នាំថ្មី។

លោក Nithipat និយាយទៀតថា ចំនួនអ្នកឆ្លងថ្មីប្រចាំថ្ងៃ អាចឡើងដល់ចំណុចកំពូលចន្លោះពី ១០,០០០ទៅ២០,០០០ករណី ប៉ុន្តែសង្ឃឹមថា មានតែប្រហែល២% ប៉ុណ្ណោះនៃករណីទាំងនោះ ដែលនឹងក្លាយជាករណីធ្ងន់ធ្ងរ ហើយវិស័យសុខាភិបាលអាចគ្រប់គ្រងបាន៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ថៃ រកឃើញអ្នកឆ្លង អូមីក្រុង ឡើងដល់ ៣ខ្ទង់