រុស្ស៊ី ចាប់ផ្តើមសមយុទ្ធយោធាជាមួយ បេឡារុស ចំពេលស្ថានភាពតានតឹងខ្លាំង

ប្រទេសរុស្សី និងបេឡារុស កំពុងចាប់ផ្តើមការធ្វើសមយុទ្ធយោធារួមគ្នារយៈពេល១០ថ្ងៃ ចំពេលមានការភ័យខ្លាចជាបន្ត អំពីការវាយប្រហាររបស់រុស្ស៊ីលើអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេឡារុស គឺជាសម្ព័ន្ធមិត្តជិតស្និទ្ធរបស់រុស្ស៊ី ហើយមានព្រំដែនភាគខាងត្បូងដ៏វែងជាមួយ អ៊ុយក្រែន។

សមយុទ្ធនេះ ត្រូវបានគេជឿថាជាការដាក់ពង្រាយយោធាធំបំផុតរបស់រុស្ស៊ីទៅកាន់ប្រទេសបេឡារុស ចាប់តាំងពីសង្គ្រាមត្រជាក់ ហើយសហរដ្ឋអាមេរិក ហៅសមយុទ្ធនេះថាជាសកម្មភាពធ្វើឲ្យស្ថានភាពកាន់តែតានតឹង។

ទាហានរុស្ស៊ីប្រហែល ៣០,០០០នាក់ បានចូលរួមក្នុងសមយុទ្ធជាមួយ បេឡារុសនេះ។

មេដឹកនាំបេឡារុសលោក Alexander Lukashenko គឺជាសម្ព័ន្ធមិត្តដ៏រឹងមាំរបស់ប្រធានាធិបតីរុស្ស៊ី លោក Vladimir Putin។ វិមានក្រឹមឡាំងបានគាំទ្រលោក Lukashenko នៅពេលការតវ៉ាទ្រង់ទ្រាយធំ ផ្ទុះឡើងក្នុងប្រទេសបេឡារុសកាលពីឆ្នាំ២០២០ ខណៈប្រទេសលោកខាងលិចភាគច្រើន បានដាក់ទណ្ឌកម្ម និងបដិសេធទទួលស្គាល់លទ្ធផលបោះឆ្នោត។

ស្របពេលជាមួយគ្នានោះ អ្នកនាំពាក្យវិមានក្រឹមឡាំងបានពណ៌នាសមយុទ្ធរួមគ្នានេះថា មានសារសំខាន់ ដោយនិយាយថា រុស្ស៊ី និងបេឡារុសកំពុង ប្រឈមមុខនឹងការគំរាមកំហែងដែលមិនធ្លាប់មានពីមុនមក។

ទោះបីជាយ៉ាងណាក៏ដោយ ឯកអគ្គរដ្ឋទូតសហភាពអឺរ៉ុបរបស់រុស្សី លោក Vladimir Chizhov បានប្រាប់ BBC ថា ប្រទេសរបស់លោកនៅតែជឿជាក់ថា ផ្នែកការទូតអាចជួយបន្ធូរបន្ថយវិបត្តិអ៊ុយក្រែនបាន។ លោកបញ្ជាក់​ថា ទាហាន​រុស្ស៊ី​ដែល​កំពុង​ឈរជើង​ក្នុង​ប្រទេស​បេឡារុសបច្ចុប្បន្ន ​នឹង​ត្រឡប់​ទៅ​មូលដ្ឋាន​អចិន្ត្រៃយ៍​របស់​ពួកគេ​វិញ​បន្ទាប់​ពី​សមយុទ្ធចប់៕

ប្រែសម្រួល៖ Vann Vann

ប្រភព៖ BBC

ចុចអាន៖ ចារកម្មអាមេរិក៖ រុស្ស៊ី ប្រើពេលតែ២ថ្ងៃទេវាយអ៊ុយក្រែន ហើយជនស៊ីវិល ៥ម៉ឺននាក់អាចស្លាប់