អ៊ុយក្រែន​ ​​ដាក់​ប្រទេសក្នុងគ្រា​អាសន្ន និងប្រាប់ពលរដ្ឋឲ្យចាកចេញពី រុស្ស៊ី 

ប្រទេសអ៊ុយក្រែន​បាន​ប្រកាស​ដាក់​រដ្ឋ​ក្នុងគ្រា​អាសន្ន ​ហើយ​បាន​ប្រាប់​ពលរដ្ឋ​ខ្លួន​រាប់​លាន​នាក់​ដែល​រស់​នៅ​ក្នុង​ប្រទេស​រុស្ស៊ី​ ឲ្យវិល​ត្រលប់​មកផ្ទះ​វិញ ​ចំពេល​មាន​ការ​ភ័យ​ខ្លាចផ្ទុះ​សង្គ្រាម។

ភាពអាសន្នរយៈពេល៣០ថ្ងៃ អនុញ្ញាតឲ្យអាជ្ញាធរអនុម័តវិធានការសន្តិសុខបន្ថែម រួមទាំងការដាក់បម្រាមគោចរផងដែរ ប្រសិនបើចាំបាច់។

ច្បាប់គ្រាអាសន្ននេះ បានទទួលការគាំទ្រយ៉ាងលើសលប់ពីសំណាក់សមាជិកសភាកាលពីថ្ងៃពុធទី២៣ខែកុម្ភៈ ហើយឥឡូវបានចូលជាធរមាននៅទូទាំងប្រទេស។

ច្បាប់នេះណែនាំឲ្យមានការត្រួតពិនិត្យឯកសារផ្ទាល់ខ្លួន រារាំងទាហានបម្រុងមិនឲ្យចាកចេញពីប្រទេស ហាមឃាត់ការប្រមូលផ្តុំទ្រង់ទ្រាយធំ និងដាក់កម្រិតលើប្រព័ន្ធទំនាក់ទំនងតាមវិទ្យុ។

អភិបាលទីក្រុង គៀវ និយាយថា ប៉ុស្តិ៍ត្រួតពិនិត្យនឹងត្រូវបានបង្កើតឡើងនៅតាមដងផ្លូវចូលទៅក្នុងទីក្រុង ហើយការចូលទៅកាន់អគាររដ្ឋាភិបាលនឹងត្រូវបានរឹតបន្តឹង។

មុននេះ អ៊ុយក្រែនបាននិយាយថា ខ្លួនកំពុងបញ្ជាឲ្យពលរដ្ឋរបស់ខ្លួនចាកចេញពីប្រទេសរុស្ស៊ី ដោយសារតែ ការកើនឡើងការគំរាមកំហែងរបស់រុស្ស៊ីអាចប៉ះពាល់ដល់ជំនួយកុងស៊ុល។

ជនជាតិអ៊ុយក្រែនប្រមាណ២លាននាក់ ត្រូវបានគេជឿថា កំពុងរស់នៅជាអចិន្ត្រៃយ៍ក្នុងប្រទេសរុស្ស៊ី ហើយពី ១ទៅ២លាននាក់ទៀត ត្រូវបានគេគិតថា នឹងស្នាក់នៅទីនោះក្នុងនាមជាពលករចំណាកស្រុក។

យោធានៅទីក្រុង គៀវ ក៏កំពុងកែនទាហានបម្រុងទាំងអស់ដែលមានអាយុពី១៨ទៅ៦០ឆ្នាំ សម្រាប់រយៈពេលអតិបរមាមួយឆ្នាំផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ អតីត មេ បញ្ជាការ កំពូល អង្គការណាតូ ព្រមានថា សង្គ្រាម នុយក្លេអ៊ែរ ជាមួយ រុស្ស៊ី អាច កើត ឡើង