អ៊ុយក្រែន ទាមទារមួយចំណុចធំ មុនជំនួបកំពូលជាមួយ រុស្ស៊ី ថ្ងៃនេះ

ប្រទេសអ៊ុយក្រែន​បានទាមទារឲ្យ​លោក ​ពូទីន “ចុះចាញ់” ខណៈរដ្ឋមន្ត្រីការបរទេសរបស់​វិមាន​ក្រឹមឡាំងលោក Sergei Lavrov កំពុងត្រៀម​ខ្លួន​សម្រាប់​ការ​ចរចា​សន្តិភាព ​ជាមួយសមភាគីទីក្រុងកៀវ ក្នុង​ប្រទេស​តួកគី​នៅ​ថ្ងៃ​ព្រហស្បតិ៍ទី១០ខែមីនានេះ។

អ្នកការទូតជាន់ខ្ពស់បំផុតរបស់ទីក្រុងមូស្គូ បានទៅដល់ទីក្រុងរមណីយដ្ឋាន Antalya ភាគខាងត្បូងប្រទេសតួកគី ដើម្បីចរចាជាមួយលោក Dmytro Kuleba ក្នុងកិច្ចប្រជុំកំពូល ដែលសម្របសម្រួលដោយរដ្ឋាភិបាលទីក្រុងអង់ការ៉ា។

កិច្ចប្រជុំរបស់រុស្ស៊ី និងអ៊ុយក្រែន នឹងក្លាយជាជំនួបការទូតកម្រិតខ្ពស់បំផុត ចាប់តាំងពីវិមានក្រឹមឡាំង បើកប្រតិបត្តិការយោធាលើប្រទេស អ៊ុយក្រែន។

ប៉ុន្តែនៅក្នុងវីដេអូលើ Facebook ដែលបញ្ជាក់ថាកិច្ចពិភាក្សានេះនឹងដំណើរការទៅមុខ, លោក Kuleba បាននិយាយថា លោកមិនរំពឹងទុកខ្លាំងពេកទេ ហើយថា ភាពជោគជ័យនៃការចរចាគឺអាស្រ័យលើការណែនាំនិងបញ្ជាដែលវិមានក្រឹមឡាំងដាក់ឲ្យលោក Lavrov។

កាលពីប៉ុន្មានថ្ងៃមុន រុស្ស៊ីបានទាមទារឲ្យអ៊ុយក្រែនបញ្ឈប់សកម្មភាពយោធា, ផ្លាស់ប្តូររដ្ឋធម្មនុញ្ញរបស់ខ្លួនដើម្បីរក្សាអព្យាក្រឹតភាព ដូច្នេះខ្លួនមិនអាចចូលរួមជាមួយ EU ឬ NATO បាន, ទទួលស្គាល់ គ្រីមៀ ជាដែនដីរុស្ស៊ីអធិបតេយ្យ និងទទួលស្គាល់សាធារណរដ្ឋផ្តាច់ខ្លួន Donetsk និង Luhansk ជាទឹកដីឯករាជ្យ។

ថ្លែងទៅកាន់ BBC Newsnight កាលពីថ្ងៃពុធទី៩ខែមីនាម្សិលមិញនេះ ឧបនាយករដ្ឋមន្ត្រីអ៊ុយក្រែន លោកស្រី Iryna Verashchuk បានហៅលក្ខខណ្ឌសន្តិភាពរបស់ទីក្រុងមូស្គូថា “ឱសានវាទ” ហើយអះអាងថា “មានតែការពិភាក្សាតែមួយប៉ុណ្ណោះដែលអាចទៅរួច នោះគឺ រុស្ស៊ីចុះចាញ់”។

“ខ្ញុំ​គិត​ថា ដើម្បីឲ្យគេបំពេញតាម​ការ​ទាមទាររបស់អ្នក អ្នក​ត្រូវ​តែហ៊ាន​និយាយ។ ប៉ុន្តែជាការពិតណាស់ ឱសានវាទដែលរុស្ស៊ីដាក់ចេញគឺមិនអាចទទួលយកបានទេ។ ការទទួលស្គាល់គ្រីមៀ ទទួលស្គាល់សាធារណរដ្ឋបំបែកខ្លួនជារដ្ឋឯករាជ្យ ទាំងនេះគឺមិនអាចទៅរួចទាំងស្រុង។

“ប្រាកដ​ណាស់ យើង​មិន​អាច​ដោះ​ដូរ​ទឹកដី​យើង​បាន​ទេ យើង​ត្រូវ​តែ​ធ្វើ​វិសោធនកម្ម​រដ្ឋធម្មនុញ្ញ។ តើយើងត្រូវប្រាប់ប្រជាជនអ៊ុយក្រែនហើយផ្តល់ផ្នែកមួយនៃអធិបតេយ្យភាពអ៊ុយក្រែនឯករាជ្យដោយរបៀបណាទៅ? តើ​យើង​នឹងប្រាប់​កូន​ចៅរបស់​យើង​ដោយ​របៀប​ណាទៅ? នេះគឺជាការលុកលុយ មិនមែនគ្រាន់តែប្រឆាំងនឹងអ៊ុយក្រែន ដូចដែលអ្នកអាចមើលឃើញយ៉ាងច្បាស់នោះទេ។ តែនេះ​ជា​បញ្ហា​ប្រឈម​សម្រាប់​ពិភពលោក​ទាំងមូល”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ីបញ្ជាក់ច្បាស់ៗ ក្រោយអ៊ុយក្រែនចោទថា ទម្លាក់គ្រាប់បែកលើមន្ទីរពេទ្យកុមារ