រុស្សី បញ្ចេញវីដេអូ យន្តហោះ Sukhoi Su-24M ទម្លាក់គ្រាប់បែកលើ កងកម្លាំងអ៊ុយក្រែន

ក្រសួងការពារជាតិរុស្ស៊ី បានបញ្ចេញវីដេអូ យន្តហោះធុន Sukhoi Su-24M ដែលកំពុងបើកការវាយប្រហារពីអាកាស ប្រឆាំងនឹងកងកម្លាំងអ៊ុយក្រែន។

វីដេអូជិត ១នាទីនេះ បានបង្ហាញឲ្យឃើញ យន្តហោះរុស្ស៊ី ទម្លាក់គ្រាប់បែកលើទីតាំងឈរជើងរបស់កងកម្លាំងអ៊ុយក្រែន ថ្វីបើមិនបញ្ជាក់អំពីទីកន្លែងក៏ដោយ។

វីដេអូនេះត្រូវបានបញ្ចេញស្របពេល វិមានក្រឹមឡាំងនិយាយថា ប្រធានាធិបតីរុស្ស៊ីលោក Vladimir Putin កាលពីថ្ងៃអង្គារទី០៣ខែឧសភា បានជូនដំណឹងដល់សមភាគីបារាំង លោក Emmanuel Macron អំពីប្រតិបត្តិការយោធារបស់រុស្ស៊ី ការពារតំបន់ Donbass និងការជម្លៀសជនស៊ីវិលចេញពីរោងចក្រ Azovstal ក្នុងទីក្រុង Mariupol។

វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយថា “ការផ្លាស់ប្តូរទស្សនៈស្តីពីស្ថានភាពនៅអ៊ុយក្រែនបានបន្ត។ ប្រធានាធិបតីរុស្ស៊ី បានជូនដំណឹងអំពីវឌ្ឍនភាពនៃប្រតិបត្តិការយោធាពិសេសដើម្បីការពារសាធារណរដ្ឋ Donbass រួមទាំងការរំដោះទីក្រុង Mariupol និងការជម្លៀសជនស៊ីវិលដែលធ្វើឡើងដោយអ្នកជាតិនិយមនៅរោងចក្រ Azovstal ដោយអនុលោមតាមកិច្ចព្រមព្រៀងដែលបានឈានដល់ ក្នុងកិច្ចប្រជុំរវាងលោក Vladimir Putin និងអគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃទី ២៦ ខែមេសា”។

លោក Putin ក៏បានប្រាប់លោក Macron ដែរថា រុស្ស៊ីនៅតែបើកចំហសម្រាប់កិច្ចសន្ទនា ជាមួយអ៊ុយក្រែន បើទោះបីជាគ្មានភាពស៊ីសង្វាក់គ្នា និងមិនមានការរៀបចំទុកជាមុនក៏ដោយ៕

សូមចុចទីនេះដើម្បីទស្សនាវីដេអូ!

ប្រែសម្រួល៖ Vann Vann

ប្រភព៖ Sputnik

ចុចអាន៖ លោក Zelensky ទទួលបានដំបូន្មាន ពីជំនួយការ អតីតនាយករដ្ឋមន្ត្រី អ៊ីស្រាអែល