លោក Zelensky ទទួលបានដំបូន្មាន ពីជំនួយការ អតីតនាយករដ្ឋមន្ត្រី អ៊ីស្រាអែល

ក្នុងរយៈពេលប៉ុន្មានសប្តាហ៍ថ្មីៗនេះ ប្រធានាធិបតីអ៊ុយក្រែនលោក Volodymyr Zelensky បានពិគ្រោះយោបល់ ជាមួយទីប្រឹក្សាទំនាក់ទំនងសាធារណៈ ២រូបរបស់អតីតនាយករដ្ឋមន្ត្រី និងជាមេដឹកនាំគណបក្សប្រឆាំងអ៊ីស្រាអែលលោក Benjamin Netanyahu ក្នុងគោលបំណងបង្កើនការគាំទ្រផ្នែកយោធាសម្រាប់ប្រទេសរបស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Walla បានរាយការណ៍ថា លោក Zelensky បានទទួលដំបូន្មានពីលោក Srulik Einhorn ដែលជាទីប្រឹក្សាជាន់ខ្ពស់គណបក្ស Likud របស់លោក Netanyahu ក្នុងអំឡុងពេលបោះឆ្នោតចុងក្រោយ។ លោក Zelensky ក៏ត្រូវបានគេរាយការណ៍ថា បានពិគ្រោះផងដែរជាមួយលោក Jonatan Urich ដែលជាជំនួយការយូរអង្វែងរបស់លោក Netanyahu ហើយបន្តធ្វើការជាអ្នកនាំពាក្យរបស់អតីតនាយករដ្ឋមន្ត្រីរូបនេះ។

ទាំងលោក Einhorn និង Urich ឥឡូវនេះ កំពុងធ្វើការនៅក្រុមហ៊ុនប្រឹក្សាយុទ្ធសាស្ត្រ perception.media រួមជាមួយបុគ្គលម្នាក់ទៀតឈ្មោះ Ofer Golan ដែលក៏ជាជំនួយការរបស់លោក Netanyahu ដែរ។

លោក Zelensky បានអំពាវនាវដល់មេដឹកនាំពិភពលោក និងសាធារណជនឲ្យគាំទ្រការតស៊ូដើម្បីសេរីភាពរបស់ប្រទេសគាត់ តាមរយៈវីដេអូដែលបានចែករំលែកយ៉ាងទូលំទូលាយ និងបានធ្វើសុន្ទរកថាពីចម្ងាយទៅកាន់សភាពិភពលោក។

កាលពីខែមេសា លោក Zelensky បានចាប់ផ្តើមយុទ្ធនាការប្រព័ន្ធផ្សព្វផ្សាយសង្គមក្រោម hashtag #ArmUkraineNow ដោយមានគោលដៅដាក់សម្ពាធជាសាធារណៈ លើរដ្ឋាភិបាលនានាឲ្យផ្គត់ផ្គង់អាវុធដល់អ៊ុយក្រែន។ លោកបានជំរុញឲ្យមនុស្សម្នា បង្ហោះរូបថតខ្លួនឯងជាមួយ hashtag នេះហើយចែករំលែកសារក្នុងចំណោមមិត្តភក្តិ និងអ្នកតាមដានប្រព័ន្ធផ្សព្វផ្សាយសង្គមរបស់ពួកគេ។

ក្នុងខែដដែលនោះ លោក Zelensky បានជួបជាមួយមន្ត្រីអាមេរិក ដោយអង្វរករឲ្យលោកខាងលិច ប្រគល់អាវុធធុនធ្ងន់ដល់អ៊ុយក្រែន។ លោកប្រធានាធិបតីបានអំពាវនាវសុំអាវុធបន្ថែមទៀត ប្រឆាំងនឹងយុទ្ធនាការរបស់រុស្ស៊ីនៅក្នុងតំបន់ Donbas ភាគខាងកើតអ៊ុយក្រែន ជាកន្លែងដែលកងកម្លាំងទីក្រុងមូស្គូ ព្យាយាមបណ្តេញកងទ័ពអ៊ុយក្រែនចុងក្រោយនៅក្នុងកំពង់ផែ Mariupol៕

ប្រែសម្រួល៖ Vann Vann

ប្រភព៖ Times of Israel

ចុចអាន៖ ពិធីកររុស្ស៊ី ព្រមានថា ក្រុងមូស្គូ បាញ់មីស៊ីលតែមួយគ្រាប់ អង់គ្លេសទាំងមូល នឹងលិចចូលសមុទ្រ