ព័ត៌មានអន្ដរជាតិ

WHO ប្រឆាំងការដាក់បម្រាមធ្វើដំណើរ ទោះផ្ទុះជំងឺ អុតស្វា

បានផុស

៤ years មុន

នៅ

ថ្ងៃសៅរ៍ ២៨ ឧសភា ២០២២

ដោយ

ប្រធាននាយកដ្ឋានជំងឺរាតត្បាតរបស់អង្គការ បាននិយាយកាលពីថ្ងៃសុក្រថា អង្គការសុខភាពពិភពលោក (WHO) មិនណែនាំប្រទេស ឲ្យដាក់កំហិតការធ្វើដំណើរ ដោយសារតែការផ្ទុះឡើងនៃជំងឺអុតស្វាឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Sylvie Briand បាននិយាយក្នុងអំឡុងសន្និសីទខ្លីមួយថា “យើងមិនណែនាំឲ្យហាមឃាត់ការធ្វើដំណើរ ឬការរឹតបន្តឹងទេ ហើយយើងត្រូវបន្តទំនាក់ទំនងអំពីអ្វីដែលយើងដឹង អ្វីដែលត្រូវធ្វើ” ។ ជាពិសេសបណ្ដាប្រទេសនានាត្រូវឆ្លើយតបឲ្យបានគ្រប់គ្រាន់ ចំពោះការរីករាលដាលនៃជំងឺអុតស្វា ដោយការតាមដានទំនាក់ទំនងរបស់អ្នកដែលឆ្លងមេរោគ និងដាក់ឲ្យនៅដាច់ដោយឡែកពីគេ។

ប្រធានលេខាធិការដ្ឋានជំងឺអុតស្វា នៅអង្គការសុខភាពពិភពលោក Rosamund Lewis បាននិយាយថា WHO មិនចាត់ទុកការចាក់វ៉ាក់សាំងទ្រង់ទ្រាយធំ ជាវិធានការចាំបាច់ ដើម្បីទប់ទល់នឹងការផ្ទុះឡើងនៃជំងឺអុតស្វានោះទេ។ លោកថា នេះគឺជាលក្ខខណ្ឌមួយដែលត្រូវបានបញ្ជូនជាចម្បង ដោយការប៉ះរាងកាយជិតស្និទ្ធ ស្បែកទៅស្បែក ការប៉ះមុខគ្នា ដូច្នេះហើយ ការតាមដានទំនាក់ទំនង ការស៊ើបអង្កេត និងការដាក់ឲ្យនៅដាច់ដោយឡែក របៀបគ្រប់គ្រងចម្បង សំខាន់សម្រាប់ពេលនេះ។

គួររំលឹកដែរថា ទីភ្នាក់ងារសន្តិសុខសុខភាពរបស់ចក្រភពអង់គ្លេស គឺជាអាជ្ញាធរសុខាភិបាលដំបូងគេនៅក្រៅទ្វីបអាហ្រ្វិក បានរាយការណ៍អំពីករណីជំងឺអុតស្វា កាលពីថ្ងៃទី ៧ ឧសភា ចំពោះអ្នកជំងឺដែលទើបតែបានធ្វើដំណើរទៅកាន់ប្រទេស នីហ្សេរីយ៉ា។ ចាប់តាំងពីពេលនោះមក ការផ្ទុះឡើងនៃជំងឺអុតស្វាក៏ត្រូវបានបញ្ជាក់ នៅក្នុងប្រទេសមួយចំនួន នៃទ្វីបអឺរ៉ុប និងអាមេរិកខាងជើង។ អុតស្វា គឺជាជំងឺមេរោគដ៏កម្រមួយ បានចម្លងទៅមនុស្សពីសត្វព្រៃ។ ជំងឺនេះអាចឆ្លងតាមរយៈវត្ថុរាវក្នុងរាងកាយ ដំណក់ទឹកតាមផ្លូវដង្ហើម និងវត្ថុធាតុកខ្វក់ផ្សេងទៀត ដែលជាធម្មតាបណ្ដាលឲ្យមានគ្រុនក្ដៅ ឡើងកន្ទួល និងហើមកូនកណ្ដុរ។

ដោយឡែក គិតត្រឹមថ្ងៃព្រហស្បតិ៍ WHO បានចុះបញ្ជីករណីជំងឺអុតស្វាប្រហែល ២០០ ករណី នៅជាង ២០ ប្រទេសជុំវិញពិភពលោក ដោយមានករណីចំនួន ១០០ ផ្សេងទៀត កំពុងត្រូវបានស៊ើបអង្កេត៕

ប្រែសម្រួល៖ សាង ស្រីល័ក្ខ

ប្រភព៖sputnik

ចុចអាន៖WHO៖ គ្មានភស្តុតាងណាបង្ហាញថា ជំងឺអុតស្វាមានការបំប្លែងខ្លួន

Related Topics:អង្គការសុខភាពពិភពលោក (WHO)ជំងឺអុតស្វា