ទីក្រុងនៅម៉ិកស៊ិក មួយថ្ងៃបើកទឹកឲ្យប្រើតែ ៦ម៉ោងប៉ុណ្ណោះ

ទីក្រុងម៉ិកស៊ិកមួយ ក្នុងរដ្ឋ Nuevo Leon កំពុងកំណត់ការប្រើប្រាស់ទឹកប្រចាំថ្ងៃ ពោលគឺបើកទឹកឲ្យប្រជាពលរដ្ឋប្រើត្រឹមតែ៦ម៉ោងប៉ុណ្ណោះក្នុងមួយថ្ងៃ ដើម្បីឆ្លើយតបទៅនឹងគ្រោះរាំងស្ងួតជាប្រវត្តិសាស្ត្រនៅក្នុងតំបន់។

ទីក្រុង Monterrey ដែលជាមជ្ឈមណ្ឌលពាណិជ្ជកម្មដ៏សំខាន់មានប្រជាជនចំនួន ៥.៣ លាននាក់ នឹងអនុញ្ញាតឲ្យប្រើប្រាស់ទឹកចាប់ពីម៉ោង ៤ព្រឹកដល់ម៉ោង ១០ព្រឹកជារៀងរាល់ថ្ងៃ។ គោលការណ៍ពីមុនរបស់ទីក្រុងនេះ បានដាក់កម្រិត ឲ្យប្រើទឹកត្រឹមមួយថ្ងៃ ក្នុងមួយសប្តាហ៍ដោយផ្អែកលើទីតាំង។

​នេះ​ជា​វិធានការ​ចុងក្រោយបង្អស់​របស់​អាជ្ញាធរ​ ដើម្បី​ដោះស្រាយ​ការ​ខ្វះខាត​ទឹក​ក្នុង​តំបន់។

នាយករដ្ឋាករទឹកទីក្រុង លោក Juan Ignacio Barragan បាននិយាយនៅក្នុងសន្និសីទសារព័ត៌មានមួយថា តម្រូវការបច្ចុប្បន្ន គឺលើសពីការផ្គត់ផ្គង់ប្រហែល ២.៥ ម៉ែត្រគូបក្នុងមួយវិនាទី។

គួរបញ្ជាក់ថា រដ្ឋ Nuevo Leon ដែល​បាន​ជួបប្រទះ​សីតុណ្ហភាព​លើស៤០អង្សាសេ បានប្រកាសដាក់រដ្ឋ​ក្នុង​ភាព​អាសន្នដោយសារគ្រោះ​រាំង​ស្ងួត​ខ្លាំងធ្ងន់ធ្ងរ កាលពី​ខែ​កុម្ភៈ។

យោងតាមលោក Barragan, តំបន់នេះមានបរិមាណទឹកភ្លៀងតិចជាងការរំពឹងទុកចាប់តាំងពីឆ្នាំ ២០១៥មក៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ស្លាប់​ ៥៣ នាក់ ក្នុងឧបទ្ទវហេតុ​ដ៏រន្ធត់នៅ ម៉ិកស៊ិក ខណៈប្រថុយជីវិតទៅព្រំដែន អាមេរិក