អ៊ុយក្រែន ប្រាប់លក្ខខណ្ឌ ដែលអាចឲ្យ ការចរចាសន្តិភាពជាមួយរុស្ស៊ី កើតឡើងបាន (មានវីដេអូ)

រដ្ឋមន្ត្រីការបរទេសអ៊ុយក្រែន លោក Dmitry Kuleba បានប្រកាសថា ការចរចាសន្តិភាពជាមួយទីក្រុងមូស្គូ អាចកើតឡើងបាន លុះត្រាតែរុស្ស៊ីបរាជ័យក្នុងសមរភូមិ។

នៅក្នុងបទសម្ភាសន៍ជាមួយទស្សនាវដ្តី Forbes អ៊ុយក្រែន ដែលចេញផ្សាយកាលពីថ្ងៃចន្ទទី១៨ខែកក្កដា លោក Kuleba បានចាត់ទុក “អាកប្បកិរិយាបង្កហេតុអាក្រក់” របស់រុស្ស៊ី ថាជាហេតុផលសម្រាប់អវត្តមាននៃកិច្ចចរចាសន្តិភាព។

លោក Kuleba បានពន្យល់ថា “ខ្ញុំប្រាប់ដៃគូទាំងអស់នូវរឿងសាមញ្ញមួយ។ នោះគឺថា “រុស្ស៊ីនឹងអង្គុយនៅតុចរចា បន្ទាប់ពីចាញ់នៅសមរភូមិ។ បើ​មិន​ដូច្នេះ​ទេ វា​នឹង​ក្លាយ​ជា​ភាសា​នៃ​ឱសានវាទ​ម្ដង​ទៀត”។

លោកសង្កត់ធ្ងន់ថា លោកប្រធានាធិបតី Zelensky មិនច្រានចោលលទ្ធភាពនៃការចរចាឡើយ ប៉ុន្តែជឿថា “មិនមានហេតុផល” សម្រាប់កិច្ចពិភាក្សានៅពេលនេះទេ។ គាត់បានទាក់ទងរឿងនេះ ទៅកាន់មេដឹកនាំនៃប្រទេសដែលបានណែនាំអំពីការចរចា។ មេដឹកនាំ​ទាំងនោះ​ក៏ ​ឈប់​និយាយ​អំពី​រឿងនេះ​ដែរ”។

ទីក្រុងមូស្គូ និងកៀវ បានចាប់ផ្តើមកិច្ចចរចាសន្តិភាពរយៈពេលបួនថ្ងៃ បន្ទាប់ពីការវាយលុករបស់យោធារុស្ស៊ីនៅអ៊ុយក្រែន ចាប់ផ្តើមកាលពីចុងខែកុម្ភៈ។ ភាគីទាំងពីរ បានជួបប្រជុំគ្នាដោយផ្ទាល់ជាច្រើនលើក នៅប្រទេសបេឡារុស ហើយបន្ទាប់មកបានបន្តកិច្ចពិភាក្សាតាមរយៈវីដេអូ។

កាល​ពី​ចុង​ខែ​មីនា គណៈប្រតិភូ​មក​ពី​រុស្ស៊ី និង​អ៊ុយក្រែន ​បាន​ជួប​គ្នា​ម្តង​ទៀត​នៅ​ក្រុង ​អ៊ីស្តង់ប៊ុល នៃប្រទេសតួកគី។ ទោះបី​ជា​យ៉ាង​ណាក៏ដោយ ​ចាប់​តាំង​ពី​ពេល​នោះ​មក ការ​ចរចា​បាន​ជាប់គាំង​ទាំង​ស្រុង។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា រុស្ស៊ីបានផ្តល់ឲ្យអ៊ុយក្រែននូវពង្រាងកិច្ចព្រមព្រៀងមួយ ប៉ុន្តែទីក្រុងកៀវមិនបានអើពើឡើយ។ លោក Peskov ធ្លាប់បានចោទប្រកាន់សហរដ្ឋអាមេរិក និងសម្ព័ន្ធមិត្តរបស់ខ្លួនថា ព្យាយាមយ៉ាងសកម្មចង់ឲ្យសង្រ្គាមបន្ត ហើយមិនអនុញ្ញាតឲ្យទីក្រុង កៀវ គិត ឬនិយាយ ឬពិភាក្សាអំពីសន្តិភាពនោះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន៖ ទណ្ឌកម្មលោកខាងលិច មិនអាចទុករុស្ស៊ី ឲ្យនៅឯកោ បានឡើយ