មិនខុសពី អាមេរិក, ចិន គំរាមឆ្លើយតបសាហាវៗលើ លីទុយអានី ក្រោយក្រុមមន្ត្រីធ្វើដំណើរមក តៃវ៉ាន់

យោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេសចិនកាលពីថ្ងៃព្រហស្បតិ៍បានឲ្យដឹងថា ប្រទេសចិនបានថ្កោលទោសចំពោះដំណើរទស្សនកិច្ចរបស់មន្ត្រីលីទុយអានីទៅកាន់កោះតៃវ៉ាន់ និងបានប្តេជ្ញាឆ្លើយតបយ៉ាងសាហាវៗលើចំណាត់ការនេះ ដោយសារតែវាជាការប្រមាថចំពោះគោលការណ៍ “ចិនតែមួយ” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន ក្រសួងការបរទេសរបស់តៃវ៉ាន់បានប្រកាសថា អនុរដ្ឋមន្ត្រីក្រសួងដឹកជញ្ជូន និងទំនាក់ទំនងលីទុយអានី លោកស្រី Agne Vaiciukeviciute បានមកដល់កោះប្រជាធិបតេយ្យមួយនេះ រួមជាមួយនឹងគណៈប្រតិភូ ១១ នាក់ផ្សេងទៀតក្នុងដំណើរទស្សនកិច្ចរយៈពេល ៥ ថ្ងៃ ។

ដំណើរទស្សនកិច្ចនេះកើតឡើងភ្លាមៗ បន្ទាប់ពីប្រធានសភាអាមេរិកលោកស្រី Nancy Pelosi បានធ្វើដំណើរទៅកាន់កោះនេះកាលពីថ្ងៃទី ២ ខែសីហា ដែលជាទង្វើបង្កឲ្យមានប្រតិកម្មយ៉ាងខ្លាំងក្លាពីទីក្រុងប៉េកាំង ប៉ុន្តែបែរជាមានការអបអរសាទរពីសំណាក់រដ្ឋាភិបាលទីក្រុង Vilnius របស់លីទុយអានីទៅវិញ ។

អ្នកនាំពាក្យក្រសួងការបរទេសចិន លោក Wang Wenbin បាននិយាយនៅក្នុងសន្និសីទសារព័ត៌មានប្រចាំថ្ងៃថា “ប្រទេសចិនថ្កោលទោសយ៉ាងខ្លាំងចំពោះប្រទេសលីទុយអានីសម្រាប់ការប្រឆាំងជាមួយចិន ហើយវាជាការបំពានដោយចេតនារបស់ពួកគេលើអធិបតេយ្យភាពរបស់ប្រទេសចិន និងការជ្រៀតជ្រែកយ៉ាងធ្ងន់ធ្ងរនៅក្នុងកិច្ចការផ្ទៃក្នុងរបស់ប្រទេសចិន” ។

លោក Wang បានទទូចថា ក្រោមលក្ខខណ្ឌនៃការបង្កើតទំនាក់ទំនងការទូតរវាងចិន និងលីទុយអានី, រដ្ឋាភិបាលទីក្រុង Vilnius មានកាតព្វកិច្ចទទួលស្គាល់ទីក្រុងប៉េកាំងជារដ្ឋាភិបាលស្របច្បាប់តែមួយគត់របស់ចិន និងតៃវ៉ាន់ ពោលមានន័យថា លីទុយអានីមិនអាចបង្កើតទំនាក់ទំនងផ្លូវការ ឬចូលរួមក្នុងទំនាក់ទំនងផ្លូវការណាមួយជាមួយទីក្រុងតៃប៉ិបានទេ ។

ជាចុងក្រោយអ្នកនាំពាក្យក្រសួងការបរទេសចិនរូបនេះបញ្ជាក់ថា ដំណើរទស្សនកិច្ចរបស់មន្ត្រីលីទុយអានីទៅកាន់កោះតៃវ៉ាន់គឺជា “ការបំពានលើជំនឿយ៉ាងធ្ងន់ធ្ងរ ហើយយើង​ជំរុញ​អ្នក​ដែល​ពាក់ព័ន្ធ​នៅ​ខាង​លីទុយអានី​កុំ​បន្ត​ធ្វើ​ជា​កូនអុក​នៃ ‘ឯករាជ្យ​តៃវ៉ាន់’ ក៏ដូចជា​ប្រឆាំងនឹងរដ្ឋាភិបាលប្រទេស​ចិន ហើយ​ឈប់​បន្ត​ដើរ​នៅលើ​ផ្លូវ​ខុស​ទៀតទៅ” ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ក្រោយបញ្ចប់ដំណើរទស្សនកិច្ចនៅ តៃវ៉ាន់ លោកស្រី Pelosi សរសើរ ចិន ពេញៗមាត់