លោក ប្រាយុទ្ធ ដាក់ឯកសារ ៣០ ទំព័រទៅតុលាការធម្មនុញ្ញ ដើម្បីរក្សា​តំណែងនាយករដ្ឋមន្ត្រី

នៅក្នុងសមរភូមិដែលកំពុងបន្តដើម្បីឲ្យលោក ប្រាយុទ្ធ ចាន់អូចា បន្តកាន់តំណែងជានាយករដ្ឋមន្ត្រីនៃប្រទេសថៃ បន្ទាប់ពីព្យួរពីតួនាទី, បច្ចុប្បន្ននេះក្នុងនាមរដ្ឋមន្ត្រីការពារជាតិ លោកបានឲ្យក្រុមអ្នកច្បាប់ដាក់ឯកសារចំនួន ៣០ ទំព័រស្ដីអំពីការការពារប្រឆាំងនឹងអំណះអំណាងទាំងអស់ទាក់ទងនឹងអាណត្តិរបស់គាត់ទៅកាន់តុលាការធម្មនុញ្ញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំឡុងពេល​ព្យួរ​តំណែងកាលពីថ្ងៃទី ២៤ ខែសីហា លោក​ប្រាយុទ្ធ​ត្រូវ​បាន​ផ្តល់​ពេល​ប្រហែល​ ២ សប្តាហ៍​ដើម្បី​រៀបចំ​សេចក្តីថ្លែងការណ៍​ ក៏ដូចជាបង្កើត​សំណុំរឿង​សម្រាប់​បន្ត​ជា​នាយករដ្ឋមន្ត្រី ។ ក្រោយមកក្រុមអ្នកច្បាប់របស់គាត់បានដំណើរនិតិវិធីភ្លាមៗ ពោលរយៈពេលត្រឹមតែ ៨ ថ្ងៃប៉ុណ្ណោះ បន្ទាប់ពីការប្រកាសព្យួរតួនាទី ។

ទោះបីជារដ្ឋធម្មនុញ្ញបច្ចុប្បន្នចែងថា នាយករដ្ឋមន្ត្រីអាចកាន់តំណែងអតិបរមាបាន ៨ ឆ្នាំក៏ដោយ ក៏ភាពចម្រូងចម្រាសកើតឡើងរួចទៅហើយ ចាប់តាំងពីពេលវេលាដែលអាណត្តិ ៨ ឆ្នាំរបស់លោក ប្រាបយុទ្ធ បានចាប់ផ្តើម ។

ទន្ទឹមនោះមនុស្សជាច្រើនប្រកែកថា លោក ប្រាយុទ្ធ បានចាប់ផ្តើមកាន់តំណែងនៅថ្ងៃទី ២៤ ខែសីហា ឆ្នាំ ២០១៤ នៅពេលដែលលោកត្រូវបានតែងតាំងជាផ្លូវការលើកដំបូងជានាយករដ្ឋមន្ត្រី បន្ទាប់ពីការដណ្តើមអំណាចនៅក្នុងរដ្ឋប្រហារយោធាកាលពីប៉ុន្មានខែមុន ។ ប៉ុន្តែ​ចំណុច​សំខាន់​នៃ​ការ​ប្រកែកគ្នានេះ​គឺ​រដ្ឋធម្មនុញ្ញ​មិន​បាន​ផ្តល់​សច្ចាប័ននោះទេ ​រហូត​ដល់ ៤ ​ឆ្នាំ​ក្រោយ​មក ។

អ្នកផ្សេងទៀតជំទាស់ថា កាលបរិច្ឆេទស្របច្បាប់សម្រាប់អាណត្តិរបស់គាត់គឺចាប់ផ្ដើមថ្ងៃទី ៦ ខែមេសាឆ្នាំ ២០១៧ បន្ទាប់ពីត្រូវបានចុះហត្ថលេខាដោយព្រះអង្គ Vajiralongkorn ព្រះមហាក្សត្រនៃព្រះរាជាណាចក្រថៃ ។ ដោយឡែកបក្សពួករបស់លោក ប្រាយុទ្ធ គិតថា អាណត្តិរបស់គាត់បានចាប់ផ្តើមនៅថ្ងៃទី ៩ ខែមិថុនា ឆ្នាំ ២០១៩ ជាកាលបរិច្ឆេទដែលនាយករដ្ឋមន្ត្រីបានចាប់ផ្តើមអាណត្តិទី ២ របស់គាត់ ហើយជាអាណត្តិទី ១ ក្រោមរដ្ឋធម្មនុញ្ញថ្មី ។

ជាមួយនឹងគំនិតនោះ តុលាការធម្មនុញ្ញត្រូវពិចារណាលើឯកសារ ៣០ ទំព័រដែលបានដាក់ជូនកាលពីថ្ងៃព្រហស្បតិ៍ ហើយសម្រេចថាតើអាណត្តិរបស់លោក ប្រាយុទ្ធ ចាន់អូចា បានបញ្ចប់ក្នុងខែសីហា ឬអាចបន្តរហូតដល់ខែមេសា ឆ្នាំ ២០២៥ ឬខែមិថុនា ឆ្នាំ ២០២៧ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ នាយកដ្ឋានឧតុនិយម ថៃ ឆ្លើយបែបណា រឿងថា បាងកក នឹងជួបគ្រោះទឹក​ជំនន់ដូច ១០ ឆ្នាំមុន