អ្នកការទូតកំពូល អាមេរិក-ចិន ជួបគ្នា នៅខាងក្រៅមហាសន្និបាត UN 

អ្នកការទូតកំពូលរបស់សហរដ្ឋអាមេរិកបានប្រាប់សមភាគីចិនថា ប្រទេសទាំងពីរ ត្រូវតែរក្សាបណ្តាញទំនាក់ទំនងឲ្យបើកចំហ ខណៈការប្រកួតប្រជែង និងភាពតានតឹងទូទាំងពិភពលោកនៅតែបន្តកើតមានរវាងទីក្រុងវ៉ាស៊ីនតោន និងប៉េកាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសអាមេរិក លោក Antony Blinken បានជួបជាមួយរដ្ឋមន្ត្រីការបរទេសចិន លោក Wang Yi កាលពីថ្ងៃសុក្រទី២៣ខែកញ្ញា នៅខាងក្រៅមហាសន្និបាតអង្គការសហប្រជាជាតិ (UNGA) ក្នុងទីក្រុងញូវយ៉ក។

ក្រសួងការបរទេសអាមេរិក បាននិយាយថា “លោករដ្ឋមន្ត្រី Blinken បានពិភាក្សាអំពីភាពចាំបាច់ក្នុងការរក្សាទំនាក់ទំនងឲ្យបើកចំហ និងគ្រប់គ្រងទំនាក់ទំនងរវាងសហរដ្ឋអាមេរិក និងសាធារណរដ្ឋប្រជាមានិតចិន ជាពិសេសក្នុងអំឡុងពេលមានភាពតានតឹង”។

កិច្ចប្រជុំនេះកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីអាមេរិកលោក Joe Biden បានធ្វើឲ្យទីក្រុងប៉េកាំងខឹងសម្បា ដោយសារតែការបញ្ជាក់ជាថ្មីថា កងកម្លាំងអាមេរិកនឹងការពារកោះតៃវ៉ាន់ ក្នុងករណីចិន លុកលុយ។

ទោះបីជាយ៉ាងណាក៏ដោយ កាលពីថ្ងៃសុក្រ លោក Blinken បានសង្កត់ធ្ងន់លើការប្តេជ្ញាចិត្តរបស់ទីក្រុងវ៉ាស៊ីនតោន ក្នុងការរក្សាសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ ស្របតាមគោលការណ៍ចិនតែមួយ ដែលក្រោមគោលការណ៍នេះ សហរដ្ឋអាមេរិកទទួលស្គាល់តែរដ្ឋាភិបាលចិនប៉ុណ្ណោះ។

ទោះបីជាមិនទទួលស្គាល់ឯករាជ្យរបស់តៃវ៉ាន់ក៏ដោយ ប៉ុន្តែសហរដ្ឋអាមេរិក មានទំនាក់ទំនងពាណិជ្ជកម្ម និងសន្តិសុខជាមួយកោះនេះ។

កាលពីខែមុន ភាពតានតឹងរវាងទីក្រុងវ៉ាស៊ីនតោន និង ប៉េកាំង បានកើនឡើងដល់កម្រិតខ្ពស់ថ្មី បន្ទាប់ពីប្រធានសភាអាមេរិក លោកស្រី Nancy Pelosi ទៅបំពេញទស្សនកិច្ចនៅកោះតៃវ៉ាន់ ដែលបង្ហាញពីការមិនគោរពចំពោះការទាមទាររបស់ចិនចំពោះកោះនេះ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ចិន ព្រមានថា សង្រ្គាមត្រជាក់ជាមួយអាមេរិក នឹងក្លាយជាមហន្តរាយសម្រាប់ពិភពលោកទាំងមូល