យន្តហោះចម្បាំងរុស្ស៊ី បាញ់មីស៊ីលប៊ិះត្រូវ យន្តហោះចារកម្មអង់គ្លេស, ទីក្រុងមូស្គូ ថាជា បញ្ហាបច្ចេកទេស (មានវីដេអូ) 

រដ្ឋមន្ត្រីការពារជាតិលោក Ben Wallace បានប្រាប់សភារបស់ចក្រភពអង់គ្លេសកាលពីថ្ងៃព្រហស្បតិ៍ទី២០ខែតុលាថា យន្តហោះចម្បាំង Su-27 របស់រុស្ស៊ី បានបាញ់មីស៊ីលមួយគ្រាប់ ប៊ិះត្រូវយន្តហោះឈ្លបយកការណ៍ Boeing RC-135 របស់អង់គ្លេស ពីលើដែនទឹកអន្តរជាតិនៃសមុទ្រខ្មៅ។

យោងតាមលោក Wallace, ឧបទ្ទវហេតុនេះកើតឡើងដោយចៃដន្យ ហើយទីក្រុងមូស្គូបានអះអាងថា វាជាបញ្ហាបច្ចេកទេស។ លោកបន្ថែមថា ទីក្រុងឡុងដ៍ ទទួលយកការពន្យល់នេះ។

លោក Wallace បានកត់សម្គាល់ថា ឧបទ្ទវហេតុរវាងយន្តហោះចារកម្ម និងយន្តហោះចម្បាំងនេះ បានកើតឡើងកាលពីថ្ងៃទី២៩ខែកញ្ញា។ បន្ទាប់ពីឧប្បត្តិហេតុនេះ ទីក្រុងឡុងដ៍ បានផ្អាកការល្បាតជាបណ្តោះអាសន្ន និងសម្តែងការព្រួយបារម្ភទៅកាន់រដ្ឋមន្ត្រីការពារជាតិរុស្ស៊ី លោក Sergey Shoigu។

លោក Wallace បញ្ជាក់ថា “ការឆ្លើយតបរបស់រដ្ឋមន្ត្រីក្រសួងការពារជាតិរុស្ស៊ីកាលពីថ្ងៃទី១០ ខែតុលា បានបំភ្លឺថា ពួកគេបានធ្វើការស៊ើបអង្កេតលើកាលៈទេសៈនៃឧប្បត្តិហេតុនេះ ហើយថា វាគឺជាបញ្ហាបច្ចេកទេសរបស់យន្តហោះចម្បាំង Su-27។ ទីក្រុងមូស្គូ បាន​ទទួល​ស្គាល់​ថា​ឧប្បត្តិហេតុ​នេះ ​បាន​កើត​ឡើង​នៅ​ក្នុង​ដែន​អាកាស​អន្តរជាតិ”។

ទោះបីជាយ៉ាងណាក៏ដោយ រហូតមកដល់ពេលនេះ រុស្ស៊ីបានរក្សាភាពស្ងៀមស្ងាត់ចំពោះការចោទប្រកាន់ថា ខ្លួនបានលុកលុយ ហើយមិនបញ្ចេញសេចក្តីថ្លែងការណ៍ជាសាធារណៈណាមួយឡើយ អំពីឧប្បត្តិហេតុនោះ។

គួរបញ្ជាក់ថា នៅឆ្នាំ២០២១ ចំនួនជើងហោះហើរឈ្លបយកការណ៍ដែលរៀបចំដោយអង្គការណាតូនៅក្នុងតំបន់សមុទ្រខ្មៅ បានកើនឡើងជាង ៦០% បើធៀបនឹងឆ្នាំ ២០២០។ នេះបើយោងតាមក្រសួងការពារជាតិរុស្ស៊ី។

ការជួបប្រទះគ្នាចុងក្រោយបង្អស់ដែលពាក់ព័ន្ធនឹងយន្តហោះអង់គ្លេស បានកើតឡើងកាលពីខែសីហាឆ្នាំមុន នៅពេលយន្តហោះស្ទាក់ចាប់ MiG-31BM បានប្រដេញយន្តហោះស៊ើបការណ៍ RC-135 ពីដែនអាកាសរុស្ស៊ីលើសមុទ្រ Barents ក្បែរទីក្រុង Murmansk៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អាមេរិក បញ្ជូនយន្តហោះ ចម្បាំង ទៅស្ទាក់ យន្តហោះ ទម្លាក់ គ្រាប់បែក រុស្ស៊ី នៅ ជិត រដ្ឋ អាឡាស្កា