អាមេរិក ត្រៀមដាក់ពង្រាយយន្តហោះទម្លាក់គ្រាប់បែក B-1B ក្នុងសមយុទ្ធជាមួយ កូរ៉េខាងត្បូង

សារព័ត៌មាន Yonhap បានរាយការណ៍ថា កងទ័ពអាកាសអាមេរិក នឹងដាក់ពង្រាយយន្តហោះទម្លាក់គ្រាប់បែកយុទ្ធសាស្ត្រធុន B-1B ក្នុងសមយុទ្ធយោធាអាមេរិក-កូរ៉េខាងត្បូង នៅថ្ងៃសៅរ៍ទី៥ ខែវិច្ឆិកានេះ បន្ទាប់ពីកូរ៉េខាងជើងបាញ់សាកល្បងមីស៊ីលមិនដកដៃ ក្នុងរយៈពេលប៉ុន្មានថ្ងៃចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងសេអ៊ូល និងវ៉ាស៊ីនតោន បាននិងកំពុងធ្វើសមយុទ្ធដែនអាកាស “Vigilant Storm” ចាប់តាំងពីថ្ងៃចន្ទទី៣១ខែតុលាមក ហើយសមយុទ្ធនេះត្រូវបន្ថែមមួយថ្ងៃទៀត មកដល់ថ្ងៃសៅរ៍នេះ ដើម្បីឆ្លើយតបទៅនឹងអ្វីដែលសម្ព័ន្ធមិត្តទាំង២ហៅថា ការបង្កហេតុជាបន្តដោយកូរ៉េខាងជើង។

សារព័ត៌មាន Yonhap ចុះផ្សាយថា នេះជាលើកទីមួយហើយដែលយន្តហោះទម្លាក់គ្រាប់បែក B-1B ត្រូវបានដាក់ពង្រាយក្នុងសមយុទ្ធរវាងសហរដ្ឋអាមេរិក និងកូរ៉េខាងត្បូង ចាប់តាំងពីឆ្នាំ ២០១៧មក។ សហរដ្ឋអាមេរិក បានរក្សាទុកយន្តហោះទម្លាក់គ្រាប់បែកចំនួន៤គ្រឿងនៅលើកោះ Guam ចាប់តាំងពីចុងខែតុលាមក។

កូរ៉េខាងត្បូង បានស្នើឲ្យសហរដ្ឋអាមេរិក បង្កើនការដាក់ពង្រាយយានយុទ្ធសាស្ត្រ ដែលរួមមានទាំងនាវាផ្ទុកយន្តហោះ នាវាមុជទឹកនុយក្លេអ៊ែរ និងយន្តហោះទម្លាក់គ្រាប់បែករយៈចម្ងាយឆ្ងាយដូចជា B-1B ផងដែរ។

ទោះបីជាយ៉ាងណាក៏ដោយ ភ្លាមៗនេះ អាជ្ញាធរអាមេរិក និងកូរ៉េខាងត្បូង មិនបានឆ្លើយតបចំពោះសំណើសុំការអត្ថាធិប្បាយទេ៕

ប្រែសម្រួល៖ Vann Vann

ប្រភព៖ CNA

ចុចអាន៖ ពូទីន ដាក់ពង្រាយយន្តហោះទម្លាក់គ្រាប់បែកនុយក្លេអ៊ែរ ក្បែរមាត់ទ្វារ ណាតូ