វីដេអូថតជាប់ លោក Xi បន្ទោសលោក Trudeau នៅកិច្ចប្រជុំកំពូល G20

ប្រធានាធិបតីចិន លោក Xi Jinping ត្រូវបានគេថតជាប់ ខណៈលោកចោទប្រកាន់នាយករដ្ឋមន្ត្រីកាណាដាលោក Justin Trudeau ពីការធ្វើឲ្យលេចធ្លាយព័ត៌មានលម្អិតនៃកិច្ចប្រជុំ។ វីដេអូនេះ ត្រូវបានបញ្ចេញប៉ុន្មានថ្ងៃបន្ទាប់ពីមេដឹកនាំទាំង២ ជួបពិភាក្សាគ្នាក្នុងកិច្ចប្រជុំកំពូល G20 នៅលើកោះបាលី។

លោក Xi បានប្រាប់លោក Trudeau តាមរយៈអ្នកបកប្រែថា នេះគឺជារឿងមិនសមរម្យ ហើយបានចោទប្រកាន់នាយករដ្ឋមន្ត្រីកាណាដាថា “ខ្វះភាពស្មោះត្រង់”។

លោក Xi ទំនងជាសំដៅទៅលើរបាយការណ៍ដែលថា លោក Trudeau បានពិភាក្សាអំពីការចោទប្រកាន់ថាមានចារកម្មចិន និងការជ្រៀតជ្រែកក្នុងការបោះឆ្នោតកាណាដា អំឡុងពេលប្រជុំ។ កិច្ចពិភាក្សាបិទទ្វារ គឺជាលើកដំបូងរបស់មេដឹកនាំទាំងពីរ ក្នុងរយៈពេលជាច្រើនឆ្នាំ។

ក្នុងវីដេអូដែលថតដោយអ្នកកាសែត នៅឯការជួបជុំមេដឹកនាំពិភពលោក ដែលបានបញ្ចប់ទៅហើយនោះ លោកប្រធានាធិបតី Xi និងលោក Trudeau អាចត្រូវបានគេមើលឃើញថា កំពុងឈរនៅជិតគ្នា និងនិយាយគ្នាតាមរយៈអ្នកបកប្រែ។

មេដឹកនាំចិនបានប្រាប់លោក Trudeau ជាភាសាចិនកុកងឺថា “អ្វីគ្រប់យ៉ាងដែលយើងពិភាក្សា ត្រូវបានបែកធ្លាយទៅអ្នកសារព័ត៌មាន ហើយវាមិនសមរម្យទាល់តែសោះ”។

បន្ទាប់ពីញញឹម និងងក់ក្បាល នាយករដ្ឋមន្ត្រីកាណាដាបានឆ្លើយតបដោយនិយាយថា “នៅប្រទេសកាណាដា យើងជឿជាក់លើការសន្ទនាដោយសេរី បើកចំហ និងស្មោះត្រង់ ហើយនោះជាអ្វីដែលយើងនឹងបន្តធ្វើ”។ លោក​ Trudeau ​បន្ថែម​ថា “​យើង​នឹង​បន្ត​ សម្លឹងឆ្ពោះ​រក​ការ​ធ្វើ​ការ​រួម​គ្នា​ក្នុងន័យ​ស្ថាបនា ប៉ុន្តែ​នឹង​មានរឿង​ដែល​យើង​មិន​យល់​ស្រប​”។

លោក Trudeau ហៀបនឹងឈប់និយាយទៅហើយ ស្រាប់តែលោក Xi បានកាត់ និងស្នើសុំឲ្យគាត់ “បង្កើតលក្ខខណ្ឌ” ហើយចាប់ដៃលោក Trudeau រួចក៏ដើរចេញ។

គួរបញ្ជាក់ថា ការឆ្លើយឆ្លងគ្នានេះ បានបង្ហាញឲ្យឃើញពីភាពតានតឹងរវាងប្រទេសចិន និងកាណាដា ដែលកើនឡើងដល់កម្រិតខ្ពស់ ចាប់តាំងពីការឃុំខ្លួននាយកប្រតិបត្តិក្រុមហ៊ុន Huawei Technologies លោកស្រី Meng Wanzhou នៅក្នុងឆ្នាំ២០១៨ និងការចាប់ខ្លួនជាបន្តបន្ទាប់របស់ទីក្រុងប៉េកាំងលើជនជាតិកាណាដាពីរនាក់ពីបទចារកម្ម។ ក្រោយមក អ្នកទាំងបី ត្រូវបានដោះលែង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ចិន ចង់ជួយរុស្ស៊ី កសាង “ពិភពលោកពហុប៉ូល”