រថយន្ត បុកគ្នាជាមួយ យន្តហោះ នៅ ប៉េរូ 

មន្ត្រីប៉េរូបាននិយាយថា រថយន្តពន្លត់អគ្គិភ័យ បានបុកគ្នាជាមួយយន្តហោះរបស់ក្រុមហ៊ុនអាកាសចរណ៍ LATAM នៅលើផ្លូវរត់ នៃអាកាសយានដ្ឋានអន្តរជាតិលីម៉ា កាលពីថ្ងៃសៅរ៍ទី១៩ខែវិច្ឆិកា។

យោងតាមអាជ្ញាធរបានឲ្យដឹងថា រថយន្តកំពុងចូលរួមក្នុងការហ្វឹកហ្វឺនពន្លត់អគ្គិភ័យនៅក្បែរនោះ ហើយបានបើកចូលទៅក្នុងផ្លូវរត់ដោយគ្មានការអនុញ្ញាត។

ជើងហោះហើរ LA2213 ដែលដំណើរការជាមួយយន្តហោះ Airbus A320neo កំពុងហោះចេញពីអាកាសយានដ្ឋានរបស់ទីក្រុង លីម៉ា ឆ្ពោះទៅកាន់ទីក្រុង Juliaca ភាគខាងត្បូងប្រទេសប៉េរូ នៅពេលរថយន្តបើកចូលទៅក្នុងផ្លូវរត់ ហើយបុកស្លាបយន្តហោះ។

មានអ្នកដំណើរចំនួន១០២នាក់ និងក្រុមការងារអាកាសយានិក៦នាក់ នៅលើយន្តហោះនោះ។ ផ្នែកខ្លះនៃយន្តហោះបានឆាបឆេះ ប៉ុន្តែគ្មានក្រុមការងារអាកាសយានិក ឬអ្នកដំណើរណាម្នាក់រងរបួសនោះទេ។

ទោះបីជាយ៉ាងណាក៏ដោយ អ្នកពន្លត់អគ្គិភ័យរបស់អាកាសយានដ្ឋានពីរនាក់ នៅក្នុងរថយន្តបានបាត់បង់ជីវិត និងម្នាក់ទៀតរងរបួស។

ការិយាល័យរដ្ឋអាជ្ញា​ ​កំពុង​ស៊ើបអង្កេត​លើករណី​គ្រោះថ្នាក់​នេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ 9news

ចុចអាន៖ យន្តហោះ ចិន បើកបុករទេះឥវ៉ាន់ រេពេញផ្លូវ (មានវីដេអូ)