មកដឹងថ្ងៃ ឥណ្ឌូនេស៊ីចាប់ផ្ដើមយុទ្ធនាការចាក់វ៉ាក់សាំងកូវីដទូទាំងប្រទេស

ប្រទេសឥណ្ឌូនេស៊ីនឹងចាប់ផ្តើមយុទ្ធនាការចាក់វ៉ាក់សាំងការពារជំងឺកូវីដ ១៩ ទូទាំងប្រទេសរបស់ខ្លួននៅថ្ងៃទី ១៣ ខែមករា ខាងមុខ ខណៈប្រទេសដែលមានប្រជាជនច្រើនជាងគេទីបួននៅលើពិភពលោកកំពុងប្រយុទ្ធប្រឆាំងនឹងការផ្ទុះឡើងនូវវីរុសដ៏សាហាវបំផុតនៅអាស៊ីអាគ្នេយ៍។

លោក Budi Gunadi Sadikin រដ្ឋមន្ត្រីក្រសួងសុខាភិបាលប្រទេសឥណ្ឌូនេស៊ីបាននិយាយនៅថ្ងៃអង្គារ ទី៥ ខែមករា នៅក្នុងសេចក្តីថ្លែងការណ៍មួយថា យុទ្ធនាការនេះនឹងចាប់ផ្តើមនៅទីក្រុងហ្សាកាតា ខណៈលោកប្រធានាធិបតី Joko Widodo នឹងចាក់វ៉ាក់សាំងមុនគេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសនេះធ្វើឡើង មុនពេលទីភ្នាក់ងារស្បៀងអាហារ និងឱសថ (BPOM) របស់ប្រទេសបានផ្តល់ការយល់ព្រមប្រើប្រាស់ជាបន្ទាន់ដើម្បីអនុញ្ញាតឲ្យមានការចាប់ផ្តើមចាក់វ៉ាក់សាំងណាមួយ ហើយវ៉ាក់សាំងនេះនឹងត្រូវបានផ្តល់ជូនដោយឥតគិតថ្លៃនៅទូទាំងប្រជុំកោះ ហើយវានឹងចំណាយពេលរហូតដល់ ១៥ ខែ ។

ទន្ទឹមនោះទីភ្នាក់ងារ BPOM មិនបានឆ្លើយតបទៅនឹងសំណើសុំការអត្ថាធិប្បាយទេ ទោះបីជាទីភ្នាក់ងារនេះធ្លាប់បាននិយាយថា ខ្លួនសង្ឃឹមថាការអនុញ្ញាតឲ្យប្រើប្រាស់បន្ទាន់នឹងត្រូវបានផ្តល់ជូននៅពេលទិន្នន័យបណ្តោះអាសន្នពីការសាកល្បងព្យាបាលនៃវ៉ាក់សាំងក្រុមហ៊ុន Sinovac នៅក្នុងប្រទេសឥណ្ឌូនេស៊ី ប្រេស៊ីល និងទួរគីត្រូវបានសិក្សា ។

កាលពីមុនរដ្ឋាភិបាលបាននិយាយថា បុគ្គលិកជួរមុខចំនួន ១.៣ លាននាក់គឺស្ថិតក្នុងចំណោមអ្នកដំបូងទទួលបានវ៉ាក់សាំងដែលផលិតដោយ Sinovac Biotech របសចិន ។ ប្រទេសឥណ្ឌូនេស៊ីបានទទួលវ៉ាក់សាំង CoronaVac របស់ក្រុមហ៊ុន Sinovac ចំនួន ៣ លានដូស ក្រោយពេលដែលលទ្ធផលដំបូងពីការសាកល្បងព្យាបាលដំណាក់កាលចុងក្រោយនៃវ៉ាក់សាំង CoronaVac បានបង្ហាញថា វាមានប្រសិទ្ធភាព ៩១.២៥ ភាគរយ ។

គួរបញ្ជាក់ផងដែរថា ប្រទេសឥណ្ឌូនេស៊ីក៏នឹងទទួលបានវ៉ាក់សាំងកូវីដចំនួន ៣២៩ លានដូសផងដែរពីក្រុមហ៊ុនឱសថអាមេរិក Pfizer និងដៃគូសហការ BioNTech របស់អាល្លឺម៉ង់ និងក្រុមហ៊ុន AstraZeneca ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ចិនចាប់ផ្ដើមចាក់វ៉ាក់សាំងកូវីដទ្រង់ទ្រាយធំមុនថ្ងៃបុណ្យចូលឆ្នាំថ្មី (មានវីដេអូ)

ចុចអាន ៖ បុគ្គលិកសុខាភិបាលព័រទុយហ្គាល់ ស្លាប់ក្រោយចាក់វ៉ាក់សាំងកូវីដបាន២ថ្ងៃ