អ្នកកាសែតអាមេរិក គាំងបេះដូងស្លាប់ ក្នុងកីឡដ្ឋានកាតា អំឡុងការប្រកួត អាហ្សង់ទីន-ហូឡង់

អ្នកយកព័ត៌មានកីឡាបាល់ទាត់អាមេរិកលោក Grant Wahl បានទទួលមរណភាព ដោយសារគាំងបេះដូងនៅឯកីឡដ្ឋាន Lusail ជាកន្លែងដែលគាត់កំពុងផ្សាយផ្ទាល់ការប្រកួត World Cup វគ្គ ១/៤ ផ្តាច់ព្រ័ត្ររវាងអាហ្សង់ទីន និងហូឡង់កាលពីយប់ថ្ងៃសុក្រទី០៩ខែធ្នូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Wahl ដែលជាអ្នកឆ្លើយឆ្លងព័ត៌មានរបស់ CBS Sports មានអាយុ៤៩ឆ្នាំ។

សហព័ន្ធបាល់ទាត់អាមេរិកបាននិយាយនៅក្នុងសេចក្តីថ្លែងការណ៍មួយថា “គ្រួសារបាល់ទាត់អាមេរិកទាំងមូល មានការសោកស្ដាយនៅពេលដឹងថា យើងបានបាត់បង់ Grant Wahl”។

Wahl បានអង្គុយក្នុងកន្លែងអ្នកសារពត៌មាន នៅជាន់ខាងលើនៃកីឡដ្ឋាន ពេលដែលគាត់បានដួល ក្នុងការប្រកួតឈានដល់ម៉ោងបន្ថែម។

ក្រុមគ្រូពេទ្យបានមកដល់ ហើយចាប់ផ្តើមធ្វើ CPR សម្រាប់រយៈពេល២០នាទីបន្ទាប់។ ក្រោយ​ពី​ការ​ប្រកួត​បាន​បញ្ចប់ Wahl ត្រូវ​បាន​គេ​យក​ចេញ​ពី​កន្លែង​កើត​ហេតុ។

ភរិយារបស់ Wahl គឺលោកស្រីវេជ្ជបណ្ឌិត Celine Gounder ដែលជាអ្នកជំនាញខាងជំងឺរាតត្បាតក្នុងក្រុមការងារកូវីដរបស់រដ្ឋបាលលោក Joe Biden បានបញ្ជាក់ពីការស្លាប់របស់ស្វាមី ក្នុងសេចក្តីថ្លែងការណ៍មួយនៅលើ Twitter។

គួរបញ្ជាក់ថា Wahl បានធ្វើឲ្យគេគ្រប់គ្នាចាប់អារម្មណ៍ពេល World Cup ចាប់ផ្តើមដំបូង នៅពេលគាត់ត្រូវបានឃាត់ខ្លួនដោយបុគ្គលិកសន្តិសុខនៅឯកីឡដ្ឋាន Ahmad bin Ali របស់ប្រទេសកាតា ដោយសារពាក់អាវឥន្ទធនូទៅកាន់ការប្រកួត World Cup រវាងសហរដ្ឋអាមេរិកទល់នឹងក្រុម វែលស៍។ គាត់​និយាយ​ថា គាត់​ពាក់​អាវ​នេះ​ជា​ការ​បង្ហាញ​ពី​សាមគ្គីភាព​ជាមួយ​សហគមន៍ LGBTQ+ ខណៈការស្រឡាញ់ភេទដូចគ្នាគឺជារឿងខុសច្បាប់នៅក្នុងប្រទេសកាតា៕

ប្រែសម្រួល៖ Vann Vann

ប្រភព៖ Guardian

ចុចអាន៖ ជំនួប ហូឡង់-អាហ្សង់ទីន យប់មិញ ជាការប្រកួតមានកាតលឿងច្រើនបំផុត ក្នុងប្រវត្តិសាស្រ្ត World Cup