អាមេរិក បង្កើតកងកម្លាំងអវកាសនៅ កូរ៉េខាងត្បូង ដើម្បីតាមដានការបាញ់​មីស៊ីលរបស់ កូរ៉េខាងជើង

យោធា​អាមេរិក​បាន​ដាក់​ដំណើរការ​អង្គភាព​កងកម្លាំង​អវកាស​នៅ​កូរ៉េខាងត្បូង ខណៈបេសកកម្មរបស់អង្គភាពនេះ រួមមានការប្រើប្រាស់ផ្កាយរណប ដើម្បីតាមដាន និងស្វែងរកការបាញ់មីស៊ីលរបស់កូរ៉េខាងជើង ។

ពិធីអបអរសាទរការបង្កើតអង្គភាពនេះត្រូវបានប្រារព្ធឡើងនៅឯមូលដ្ឋានអាកាស Osan ភាគខាងត្បូងនៃទីក្រុងសេអ៊ូលកាលពីថ្ងៃពុធ ដោយមានមនុស្សចូលរួមប្រហែល ១០០ នាក់ ។

លោក Joshua McCullion មន្ត្រីកំពូលនៃកងកម្លាំងអវកាសបាននិយាយថា ការបង្កើតអង្គភាពនៅកូរ៉េខាងត្បូងនេះ គឺជាការដាក់ដំណើរការអង្គភាពកងកម្លាំងអវកាសលើកទី ៣ ហើយនៅខាងក្រៅទឹកដីរបស់អាមេរិក ។

លោក McCullion បញ្ជាក់ទៀតថា អង្គភាពនេះត្រូវតែបញ្ចេញការគំរាមកំហែង និងប្រយុទ្ធ ក្នុងករណីចាំបាច់ណាមួយ ហើយ​ត្រូវ​តែ​ត្រៀម​ខ្លួន​ជានិច្ច​សម្រាប់ការ​ប្រយុទ្ធជាមួយសត្រូវ ។

ប្រធានកងកម្លាំងអវកាសអាមេរិក ដែលគ្របដណ្តប់តំបន់ឥណ្ឌូប៉ាស៊ីហ្វិករូបនេះ បានប្រាប់អ្នកសារព័ត៌មានថា យោធាអាមេរិកក៏គ្រោងនឹងពង្រីកអង្គភាពអវកាសរបស់ខ្លួននៅទីតាំងផ្សេងបន្ថែមទៀតផងដែរ ។

គួរបញ្ជាក់ថា ការបង្កើតអង្គភាពកម្លាំងអវកាសរបស់អាមេរិកកើតឡើង បន្ទាប់ពីកងទ័ពអាកាសរបស់កូរ៉េខាងត្បូងក៏ទើបតែដំណើរការកងប្រតិបត្តិការអវកាសកាលពីដើមខែនេះផងដែរ ដើម្បីសម្របសម្រួលជាមួយសហរដ្ឋអាមេរិកនៅក្នុងដែនត្រួតពិនិត្យរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ប៉ូលិសរឹបអូសលុយសុទ្ធ ១.៦៨ លានដុល្លារ រឿងពុករលួយម្ចាស់ផ្ទះ World Cup នៅកាតា របស់លោកស្រី Eva Kaili