នេប៉ាល់ កំពុងកាន់ទុក្ខសម្រាប់ជនរងគ្រោះនៃគ្រោះមហន្តរាយផ្លូវអាកាសដ៏អាក្រក់បំផុតរបស់ប្រទេស ក្នុងរយៈពេលប្រហែល ៣ទសវត្សរ៍ចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មនុស្ស ៦៨នាក់បានស្លាប់ នៅពេលជើងហោះហើរចេញពីទីក្រុង Kathmandu ឆ្ពោះទៅកាន់ទីក្រុងទេសចរណ៍ Pokhara បានធ្លាក់ និងឆេះកាលពីថ្ងៃអាទិត្យទី១៥ខែមករា។

គេមិនទាន់ដឹងច្បាស់ថាតើ យន្តហោះនេះធ្លាក់បណ្តាលមកពីមូលហេតុអ្វីនោះទេ ប៉ុន្តែប្រទេសនេប៉ាល់មានប្រវត្តិសោកនាដកម្មនៃគ្រោះថ្នាក់ធ្លាក់យន្តហោះដែលបណ្តាលឲ្យមនុស្សស្លាប់។

ភាគច្រើននៃអ្នកដំណើរ និងអាកាយានិកចំនួន៧២នាក់នៃជើងហោះហើររបស់ក្រុមហ៊ុន Yeti Airlines បានស្លាប់ ប៉ុន្តែមានរបាយការណ៍ក្រៅផ្លូវការថា មនុស្សមួយចំនួនបានរួចរស់ជីវិត ទោះបីជាមានរបួសធ្ងន់ធ្ងរក៏ដោយ។

នាយករដ្ឋមន្ត្រីនេប៉ាល់ បានប្រកាសយកថ្ងៃចន្ទនេះ ជាថ្ងៃកាន់ទុក្ខថ្នាក់ជាតិ ហើយរដ្ឋាភិបាលបានបង្កើតក្រុមមួយដើម្បីស៊ើបអង្កេតមូលហេតុនៃគ្រោះមហន្តរាយនេះ។

ឧបទ្ទវហេតុអាកាសចរណ៍ មិនមែនជារឿងចម្លែកទេនៅក្នុងប្រទេសនេប៉ាល់។ ប្រជាជាតិហិមាល័យមួយនេះ សម្បូរទៅដោយភ្នំ ហើយមានទីតាំងពិបាកធ្វើដំណើរបំផុត។ កង្វះការវិនិយោគលើយន្តហោះថ្មី និងបទប្បញ្ញត្តិមិនល្អ ក៏ត្រូវបានស្តីបន្ទោសផងដែរនាពេលកន្លងមក។

កាលពីខែឧសភាឆ្នាំ២០២២ យន្តហោះ Tara Air បានធ្លាក់នៅភាគខាងជើងប្រទេសនេប៉ាល់ ដោយបានសម្លាប់មនុស្សចំនួន២២នាក់។ កាលពី៤ឆ្នាំមុន​ មនុស្ស៥១នាក់បានស្លាប់ នៅពេលជើងហោះហើរចេញពីប្រទេសបង់ក្លាដែស បានឆាបឆេះខណៈចុះចតនៅទីក្រុង Kathmandu៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ Update៖ គ្មានអ្នកនៅរស់ទេ ក្នុងហេតុការណ៍ធ្លាក់យន្តហោះ នេប៉ាល់