អ្នកដំណើរនៅលើជើងហោះហើររបស់ក្រុមហ៊ុន Qantas បាននិយាយថា ពួកគេឮសំឡេងខ្លាំងៗ នៅលើអាកាស ប៉ុន្តែនិយាយថា ពួកគេមិនបានដឹងថា ស្ថានភាពធ្ងន់ធ្ងរដល់ថ្នាក់នេះទេ រហូតដល់យន្តហោះចុះចតនៅម៉ោង ៣រសៀលថ្ងៃពុធទី១៨ខែមករា (ម៉ោងនៅអូស្រ្តាលី)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជើងហោះហើរ QF144 បានបង្កឲ្យមានការភ័យខ្លាចជុំវិញពិភពលោក នៅពេលអាកាសយានិក ចេញការប្រកាសអាសន្នមកកាន់ក្រុមការងារនៅដីគោក ខណៈពេលធ្វើដំណើរចេញពីទីក្រុង Auckland នៃប្រទេសនូវែលសេឡង់ ឆ្ពោះទៅកាន់ទីក្រុងស៊ីដនីនៃប្រទេស អូស្រ្តាលី។

ទោះបីជាយ៉ាងណាក៏ដោយ ​អ្នកដំណើរលើ​យន្តហោះ ​មិនដឹង​ពី​ស្ថានភាព​ធ្ងន់ធ្ងរ​នោះ​ទេ​។ អ្នកធ្វើដំណើរដំបូងដែលចុះពីលើយន្តហោះបាននិយាយថា ពួកគេមិនត្រូវបានគេប្រាប់ឲ្យដឹងថា យន្តហោះដែលពួកគេជិះមានបញ្ហាម៉ាស៊ីនឡើយ។

អ្នកដំណើរនិយាយថា ពួកគេមានអារម្មណ៍ថាញ័របន្តិច នៅពេលម៉ាស៊ីនយន្តហោះឈប់ដើរលើសមុទ្រ Tasman ហើយត្រូវបានគេជូនដំណឹងអំពីដំណើរការខុសប្រក្រតី ប៉ុន្តែគេមិនបានប្រកាសអាសន្នណាមួយនោះទេ រហូតដល់យន្តហោះចុះចត។

អ្នក​ដំណើរឈ្មោះ Simone Schmidt ​និយាយ​ថា “យើង​មិន​បាន​ដឹង​ថា ​វា​ជាការរលត់​ម៉ាស៊ីន​ទាំង​មូលមែនឬក៏អត់​នោះ​ទេ។ អ្នកបើកយន្តហោះ គឺពិតជាល្អមែនទែន អស្ចារ្យណាស់”។

អ្នកនាំពាក្យរបស់ក្រុមហ៊ុន Qantas និយាយថា យន្តហោះ បានជួបប្រទះបញ្ហាជាមួយនឹងម៉ាស៊ីនមួយក្នុងចំណោមម៉ាស៊ីនទាំងពីររបស់ខ្លួន ពោលគឺប្រហែលមួយម៉ោង ក្រោយហោះចេញពីទីក្រុងស៊ីដនី។

យន្តហោះ Boeing 737 អាចហោះហើរដោយសុវត្ថិភាពដោយប្រើម៉ាស៊ីនតែមួយ។ យន្តហោះ​ដែល​គេ​ស្គាល់​ថា​ VE-XZB មួយគ្រឿងនេះ បាន​ដំណើរការ​អស់​រយៈពេល​១០​ឆ្នាំ​មក​ហើយ ហើយ​អាច​ផ្ទុក​អ្នក​ដំណើរ​បាន១៧៤​នាក់។ ពេលនេះវិស្វកររបស់ក្រុមហ៊ុនអាកាសចរណ៍ នឹងពិនិត្យមើលយន្តហោះ៕

ប្រែសម្រួល៖ Vann Vann

ប្រភព៖ Daily Mail, SMH

ចុចអាន៖ វីដេអូចុងក្រោយ ថតផ្ទាល់នៅក្នុងយន្តហោះនេប៉ាល់ លាន់សំឡេងអ្នកដំណើរស្រែកទ្រហឹងយ៉ាងសង្វេគ