ក្រុមទាហានស៊ីឈ្នួល រុស្ស៊ី ផ្ញើសំបុត្រឆ្លើយតបជាពិសេសទៅ អាមេរិក វិញ

កាលពីពេលថ្មីៗនេះ សហរដ្ឋអាមេរិកបានប្រកាសដាក់ទណ្ឌកម្មលើក្រុមទាហានស៊ីឈ្នួលរុស្ស៊ី Wagner Group ដោយសារតែក្រុមមួយនេះត្រូវសេតវិមានចោទប្រកាន់ថា ប្រព្រឹត្តអំពើដ៏សាហាវ ក្រោយទទួលអាវុធពីកូរ៉េខាងជើង ។

ជាការឆ្លើយតប ក្រុមទាហានស៊ីឈ្នួលរុស្ស៊ី Wagner Group បានបញ្ចេញសំបុត្រខ្លីមួយជូនជាពិសេសទៅកាន់សេតវិមាន ដោយនៅក្នុងសំបុត្រនោះបានសួរតបទៅវិញថា តើក្រុម Wagner Group ត្រូវបានចោទប្រកាន់ពីបទឧក្រិដ្ឋកម្មអ្វី ទើបធ្វើឲ្យទីក្រុងវ៉ាស៊ីនតោនដាក់ទណ្ឌកម្មថ្មីមកលើក្រុមនេះ ។

ការបោះពាក្យសម្ដីរបស់ក្រុម Wagner Group កើតឡើង បន្ទាប់ពីអ្នកនាំពាក្យសន្តិសុខជាតិរបស់សេតវិមានលោក John Kirby បាននិយាយថា ក្រុមទាហានស៊ីឈ្នួលមួយនេះបាននិងកំពុងគាំទ្រកងកម្លាំងរុស្ស៊ីនៅអ៊ុយក្រែន ។

សំបុត្រជាភាសាអង់គ្លេសដែលផ្ញើទៅកាន់លោក Kirby ហើយបានបង្ហោះនៅលើបណ្តាញ Telegram របស់ស្ថាបនិកក្រុម Wagner លោក Yevgeny Prigozhin បានសរសេរថា “សូមគោរពលោក Kirby តើអ្នកអាចបញ្ជាក់ឲ្យច្បាស់ៗបានទេថា ឧក្រិដ្ឋកម្មអ្វីខ្លះត្រូវបានប្រព្រឹត្តដោយក្រុម Wagner Group?” ។

គួរបញ្ជាក់ថា បច្ចុប្បន្នសហរដ្ឋអាមេរិកបានចាត់ថ្នាក់ក្រុមទាហានស៊ីឈ្នួលរុស្ស៊ី Wagner Group ជាអង្គការឧក្រិដ្ឋកម្មឆ្លងដែនដ៏គ្រោះថ្នាក់មួយ ដោយសារតែអំពើឃោរឃៅ និងការរំលោភសិទ្ធិមនុស្ស ដែលពួកគេបាននិងកំពុងប្រព្រឹត្តនៅក្នុងប្រទេសអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ អាមេរិក ចោទ កូរ៉េខាងជើង ថាលួចផ្ដល់អាវុធឲ្យក្រុមទាហានស៊ីឈ្នួល រុស្ស៊ី ប្រើកម្ទេច អ៊ុយក្រែន