អតីតមន្ត្រីការពារជាតិ អាមេរិក ប្រាប់គោលដៅបាឡុងហោះរបស់ ចិន

អតីតរដ្ឋមន្ត្រីការពារជាតិអាមេរិក លោក Mark Esper បានលើកឡើងថា ចិនកំពុងប្រើបាឡុងហោះដើម្បីឃ្លាំមើល ក៏ដូចជាប្រមូលព័ត៌មានអំពីទីតាំងនុយក្លេអ៊ែររបស់អាមេរិក ។

នៅក្នុងបទសម្ភាសន៍ផ្ដាច់មុខជាមួយសារព័ត៌មានជប៉ុន NHK, លោក Esper បាននិយាយថា ប្រទេសចិនកំពុងព្យាយាមចង់ទទួលបានព័ត៌មានបន្ថែមអំពីទីតាំងនុយក្លេអ៊ែរជាយុទ្ធសាស្ត្ររបស់អាមេរិក ជាពិសេសបាឡុងហោះនោះគឺស្វែងរកកន្លែងដែលអាមេរិក រក្សាទុកយន្តហោះទម្លាក់គ្រាប់បែកដែលមានសមត្ថភាពនុយក្លេអ៊ែរ ។

លោក Esper បាននិយាយថា គោលបំណងបាឡុងហោះរបស់ទីក្រុងប៉េកាំងគឺដើម្បី “គ្រប់គ្រងឥណ្ឌូប៉ាស៊ីហ្វិកនៅឆ្នាំ ២០៤៩” នៅពេលដែលចិនប្រារព្ធខួប ១០០ ឆ្នាំនៃការបង្កើតសាធារណរដ្ឋប្រជាមានិតចិន ហើយពេលនោះទំនាក់ទំនង អាមេរិក-ចិន នឹងធ្លាក់ចុះមួយកម្រិតទៀត ។

មន្ត្រីជាន់ខ្ពស់មន្ទីរបញ្ចកោណរូបនេះបានអះអាងទៀតថា វត្ថុដែលជាបាឡុងចារកម្មរបស់ចិន ត្រូវបានគេដឹងថា ហោះកាត់ដែនអាកាសសហរដ្ឋអាមេរិក យ៉ាងហោចណាស់ ៣ ដង ក្នុងអំឡុងពេលដែលលោក ដូណាល់ ត្រាំ ធ្វើជាប្រធានាធិបតី ។

ប៉ុន្តែលោក Esper ដែលបម្រើការជាប្រមុខការពារជាតិក្រោមការដឹកនាំរបស់លោក ត្រាំ នៅពេលនោះ បាននិយាយថា “ខ្ញុំពិតជាមិននឹកចាំនរណាម្នាក់ដែលធ្លាប់លើកឡើងពីបញ្ហានេះទៅកាន់ការិយាល័យរបស់ខ្ញុំ ឬបង្ហាញរបាយការណ៍ស៊ើបការណ៍សម្ងាត់មួយចំនួនដល់ខ្ញុំនោះទេ” ។

លោក Esper បាននិយាយថា សហរដ្ឋអាមេរិកឥឡូវនេះទំនងជានឹងរឹតបន្តឹងការការពាររបស់ខ្លួន និងយកចិត្តទុកដាក់កាន់តែដិតដល់ទៅនឹងដែនអាកាសរបស់ខ្លួន ដើម្បីការពារឧប្បត្តិហេតុស្រដៀងគ្នានេះណាមួយបន្ថែមទៀត ហើយប្រទេសលោកខាងលិចទាំងអស់ក៏ត្រូវធ្វើដូចគ្នា ពីព្រោះនេះច្បាស់ជាមធ្យោបាយ ដែលចិនកំពុងប្រមូលព័ត៌មានពីប្រទេសផ្សេងៗ” ។

គួររំឭកថា វត្តុហោះដែលទីក្រុងវ៉ាស៊ីនតោនចាត់ទុកជា បាឡុងចារកម្មចិន ត្រូវបានបាញ់ទម្លាក់ដោយយន្តហោះ F-16 របស់អាមេរិកនៅឯឆ្នេររដ្ឋ South Carolina កាលពីថ្ងៃចន្ទសប្ដាហ៍មុន ដោយគិតរហូតមកដល់ពេលនេះ វាមានរយៈពេលប្រហែល ១០ ថ្ងៃមកហើយ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចិន វាយបកទៅ អាមេរិក វិញ រឿងបាឡុងហោះ