គ្រោះធម្មជាតិនៅប្រេស៊ីល សម្លាប់មនុស្សរាប់សិបនាក់

អាជ្ញាធរនៅក្នុងរដ្ឋ São Paulo របស់ប្រទេសប្រេស៊ីលនិយាយថា មនុស្សចំនួន៣៦នាក់ បានស្លាប់នៅក្នុងគ្រោះទឹកជំនន់និងការរអិលបាក់ដី ដែលបង្ខំឲ្យទីក្រុងមួយចំនួន លុបចោលការប្រារព្ធពិធីបុណ្យ Carnival ប្រចាំឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូ ​បង្ហាញ​ពីតំបន់​និងផ្លូវត្រូវ​ទឹកជន់​លិច ព្រមទាំង​កម្ទេច​កម្ទី​ផ្សេងៗខណៈក្រុមសង្គ្រោះបាននិងកំពុងតស៊ូ ដើម្បីទៅជួយអ្នករស់រានមានជីវិត។

ភ្លៀងបានធ្លាក់ក្នុងកម្រិតជាង៦០០មិល្លីម៉ែត្រនៅតំបន់ខ្លះកាលពីថ្ងៃអាទិត្យ ពោលគឺលើសពីកម្រិតមធ្យមប្រចាំខែដល់ទៅទ្វេដងឯណោះ។

លោក Felipe Augusto អភិបាលក្រុង São Sebastião បាននិយាយថា “យើង​មិន​ទាន់​កំណត់​ទំហំ​នៃ​ការ​ខូច​ខាត​នៅ​ឡើយ​ទេ យើង​កំពុង​ព្យាយាម​ជួយ​សង្គ្រោះ​ជន​រង​គ្រោះ”។

លោកបន្ថែមថា មនុស្សរាប់សិបនាក់បានបាត់ខ្លួននៅក្នុងទីក្រុង ហើយផ្ទះប្រហែល៥០ខ្នងបានដួលរលំ ខណៈស្ថានភាពនៅតែធ្ងន់ធ្ងរខ្លាំង។

ស្របពេលជាមួយគ្នានោះ មនុស្សរាប់រយនាក់ត្រូវបានជម្លៀស ហើយមនុស្ស ២២៨ នាក់គ្មានផ្ទះសម្បែងស្នាក់នៅ។

ស្ថានភាពគ្រោះមហន្តរាយរយៈពេល១៨០ថ្ងៃ ក៏ត្រូវបានប្រកាសផងដែរនៅទីក្រុងចំនួន៦ក្នុងរដ្ឋនេះ ដូចជា São Sebastião, Caraguatatuba, Ilhabela, Ubatuba, Guarujá និង Bertioga៕

ប្រែសម្រួល៖ Vann Vann

ប្រភព៖ BBC

ចុចអាន៖ ស្លាប់កើនដល់១០០នាក់ហើយ ក្នុងគ្រោះធម្មជាតិនៅ ប្រេស៊ីល