អតីតវេជ្ជបណ្ឌិតសេតវិមាន ព្រមានថា សុខភាពផ្លូវចិត្តរបស់លោក បៃដិន នឹងបណ្តាលឲ្យប្រជាជនអាមេរិក ស្លាប់

អតីតគ្រូពេទ្យសេតវិមាន និងជាតំណាងរាស្រ្ដមកពីគណបក្សសាធារណរដ្ឋ លោក Ronny Jackson បានចេញមុខ វាយប្រហារប្រធានាធិបតីអាមេរិកលោក Joe Biden ដោយលើកហេតុផលថា ស្ថានភាពផ្លូវចិត្តរបស់គាត់ដែលកំពុងធ្លាក់ចុះ នឹងបង្កគ្រោះថ្នាក់ដល់ប្រទេសទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jackson បានសរសេរនៅលើ Twitter កាលពីចុងសប្តាហ៍ថា “ពិតជាគួរឲ្យភ័យខ្លាចណាស់សម្រាប់ប្រទេសរបស់យើងដែលមានលោក Biden ជាមេបញ្ជាការ។ គាត់មិនដឹងថាគាត់នៅទីណាទេ ហើយជារៀងរាល់ថ្ងៃ គាត់បាននាំយើងឲ្យខិតកាន់តែជិតទៅនឹងសង្រ្គាមជាមួយរុស្ស៊ី និងចិន។ សុខភាពផ្លូវចិត្តថយចុះរបស់គាត់ នឹងបណ្តាលឲ្យមនុស្សស្លាប់!”។

លោក Jackson ដែលបានបម្រើការជាវេជ្ជបណ្ឌិតសេតវិមាន ក្រោមការដឹកនាំរបស់លោក Barack Obama និង Donald Trump រហូតដល់ឆ្នាំ២០១៨ បានរិះគន់រដ្ឋបាលអាមេរិកបច្ចុប្បន្នម្តងហើយម្តងទៀត ចំពោះការលាក់បាំងការពិតអំពីសុខភាពផ្លូវចិត្តរបស់លោក Joe Biden។

កាលពីដើមខែនេះ សេតវិមានបានចេញសេចក្តីសង្ខេប ស្តីពីស្ថានភាពសុខភាពរបស់លោក Biden ដោយផ្អែកលើការពិនិត្យប្រវត្តិវេជ្ជសាស្ត្រ និង ការពិនិត្យរាងកាយលម្អិត ដែលបានរកឃើញថា លោកប្រធានាធិបតីគឺជាបុរសមានសុខភាពល្អ រឹងមាំ និងមានអាយុ៨០ឆ្នាំស័ក្តិសម​នឹង​អនុវត្ត​ភារកិច្ចប្រទេសជាតិ។

យោងតាមការស្ទង់មតិរបស់ Harvard CAPS-Harris Poll ដែលធ្វើឡើងកាលពីដើមខែនេះ, ប្រជាជនអាមេរិកប្រហែល ៥៧% មានការងឿងឆ្ងល់អំពីសុខភាពផ្លូវចិត្តរបស់លោក Biden ខណៈ ៦៧% គិតថា គាត់ហាក់ដូចជាចាស់ពេកហើយ ក្នុងការដឹកនាំប្រទេស៕

ប្រែសម្រួល៖ Vann Vann

ប្រភព៖ RT

ចុចអាន៖ អតីតវេជ្ជបណ្ឌិតសេតវិមាន ថា គ្រូពេទ្យបានលាក់បាំង អំពីសុខភាពរបស់លោក Biden