ឆ្នាំនេះ ទ័ពជើងទឹក រុស្ស៊ី នឹងទទួលបាននាវាចម្បាំងថ្មីៗបន្ថែមទៀត

លោក Alexei Rakhmanov អគ្គនាយកក្រុមហ៊ុន United Shipbuilding Corporation (USC) បានប្រាប់សារព័ត៌មាន Sputnik ថា កងទ័ពជើងទឹករុស្ស៊ីនឹងទទួលបាននាវាចម្បាំងថ្មីចំនួន ៤ គ្រឿងនៅខែកក្កដា ឆ្នាំ ២០២៣ នេះ ខណៈដំបូងឡើយត្រូវបានកំណត់ពេលបញ្ជូនទៅកាន់កងទ័ពជើងទឹក នៅឆ្នាំ ២០២២ ប៉ុណ្ណោះ ។

លោក Rakhmanov បាននិយាយថា “ឆ្នាំនេះ កងទ័ពជើងទឹករុស្ស៊ីនឹងទទួលបាននាវាមុជទឹកមិនដើរដោយថាមពលនុយក្លេអ៊ែរ Kronstadt, នាវាចម្បាំង Golovko ក៏ដូចជា នាវាចម្បាំងធុនតូច Mercury និងនាវា Rezkiy” ។

ប្រមុខ USC រូបនេះបានបន្ថែមថា នៅខែកុម្ភៈ នាវាចម្បាំង Admiral Golovko ត្រូវបានបញ្ជូនទៅកាន់កងនាវាចរភាគខាងជើង ដើម្បីបញ្ចប់ការធ្វើតេស្ត ជាមួយនឹងការអនុវត្តសមយុទ្ធប្រយុទ្ធជាក់ស្ដែង ហើយបន្ទាប់មក នាវានេះនឹងត្រូវប្រគល់ទៅឲ្យកងទ័ពជើងទឹករុស្ស៊ីតែម្ដង ។

លោក Rakhmanov បាននិយាយទៀតថា “លើសពីនេះ នាវាចម្បាំង Neustrashimy នឹងយកចេញពីការជួសជុល ហើយចំណែកឯ នាវាមុជទឹកនុយក្លេអ៊ែរ Leopard ក៏នឹងត្រលប់ទៅកងនាវាវិញផងដែរ” ។

ជាចុងក្រោយប្រធានក្រុមហ៊ុនរូបនេះបាននិយាយថា សរុបមក USC គ្រោងនឹងផ្ទេរនាវាចម្បាំងយ៉ាងហោចណាស់ចំនួន ១១ គ្រឿងទៅកាន់កងទ័ពជើងទឹករុស្ស៊ីក្នុងឆ្នាំ ២០២៣ រួមទាំងនាវាមុជទឹកដើរដោយថាមពលនុយក្លេអ៊ែរចំនួន ៣ គ្រឿង និងដើរដោយប្រេងម៉ាស៊ូតចំនួន ២ គ្រឿង ក៏ដូចជានាវាសម្រាប់ធ្វើដំណើរក្នុងដែនសមុទ្រជិត និងឆ្ងាយផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ប្រាប់វិធីងាយៗដើម្បីបញ្ចប់សង្គ្រាមនៅ អ៊ុយក្រែន