អាមេរិក-កូរ៉េខាងត្បូង ចាប់ផ្តើម សមយុទ្ធធំបំផុតក្នុងរយៈពេល៥ឆ្នាំ (មានវីដេអូ)

នៅថ្ងៃចន្ទទី១៣ខែមីនានេះ ប្រទេសកូរ៉េខាងត្បូង និងសហរដ្ឋអាមេរិក​ បានចាប់ផ្តើមសមយុទ្ធយោធាទ្រង់ទ្រាយធំប្រចាំឆ្នាំរបស់ពួកគេហើយ។ នេះក៏ជាសមយុទ្ធរួមគ្នាធំបំផុតរបស់សម្ព័ន្ធមិត្តទាំង២ផងដែរ ក្នុងរយៈពេល៥ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Freedom Shield (FS) ដែលជា​សមយុទ្ធ​ប្រតិបត្តិការ​រយៈពេល​យូរ​បំផុត​មិន​ធ្លាប់មានរបស់​សម្ព័ន្ធមិត្ត​ទាំងពីរ ​នឹង​បន្ត​រហូតដល់​ថ្ងៃទី២៣ខែមីនា។

យោងតាមយោធា សមយុទ្ធមិនឈប់រយៈពេល១១ថ្ងៃនេះ នឹងបង្ហាញពីការរៀបចំសម្រាប់សេណារីយ៉ូសង្រ្គាមថ្មី ដែលឆ្លុះបញ្ចាំងពីការផ្លាស់ប្តូរបរិយាកាសសន្តិសុខ ដូចជាការគំរាមកំហែងនុយក្លេអ៊ែររបស់កូរ៉េខាងជើង និងសង្រ្គាមនៅអ៊ុយក្រែនជាដើម។

សមយុទ្ធនេះនឹងរួមបញ្ចូលផងដែរនូវ លំហាត់ហ្វឹកហ្វឺននៅឧបទ្វីបកូរ៉េក្រោមឈ្មោះ Warrior Shield FTX ដែលមានគោលបំណង បង្កើនកិច្ចសហប្រតិបត្តិការយោធារវាងប្រទេសទាំងពីរលើអាកាស លើគោក នៅសមុទ្រ អវកាស អ៊ីនធឺណិត និងសម្រាប់ប្រតិបត្តិការពិសេស។

យ៉ាងណាក្តី សមយុទ្ធរួមគ្នានេះ បានបង្កឲ្យមានការប្រឆាំងយ៉ាងខ្លាំងពីសំណាក់កូរ៉េខាងជើងរួចទៅហើយ ដោយទីក្រុងព្យុងយ៉ាងនិយាយថា ខ្លួននឹងចាត់វិធានការ សំខាន់ និងជាក់ស្តែង តបតទៅនឹងសមយុទ្ធនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក បញ្ជូនយន្តហោះទម្លាក់គ្រាប់បែកនុយក្លេអ៊ែរទៅ ឧបទ្វីបកូរ៉េ