កូរ៉េខាងជើង បាញ់មីស៊ីលយុទ្ធសាស្ត្រចេញពីនាវាមុជទឹក គំរាម អាមេរិក និងកូរ៉េខាងត្បូង

កូរ៉េខាងជើងបានបាញ់មីស៊ីលយុទ្ធសាស្ត្រចំនួន ២ គ្រាប់ចេញពីនាវាមុជទឹក ដើម្បីជាការគំរាមកំហែងថ្មីមួយទៀតដល់សហរដ្ឋអាមេរិក និងកូរ៉េខាងត្បូង បន្ទាប់ពីប្រទេសទាំងពីរចាប់ផ្ដើមធ្វើសមយុទ្ធយោធាទ្រង់ទ្រាយធំកាលពីថ្ងៃចន្ទ ។

លោក គីម ជុងអ៊ុន បាននិយាយថា កូរ៉េខាងជើងបានបាញ់មីស៊ីលយុទ្ធសាស្ត្រចំនួន ២ គ្រាប់ចេញពីនាវាមុជទឹកនៅភាគខាងកើតនៃឧបទ្វីបកូរ៉េ និងបានហោះហើរក្នុងចម្ងាយ ១,៥០០ គីឡូម៉ែត្រ មុនពេលវាវាយប្រហារគោលដៅ ខណៈការបាញ់នេះក៏ជាការគំរាមកំហែង ក៏ដូចជាដើម្បី “ដាក់ទណ្ឌកម្មដោយគ្មានមេត្តា” ដល់អាមេរិកផងដែរ ។

ពាក់ព័ន្ធនឹងបញ្ហានេះដែរ អគ្គសេនាធិការចម្រុះរបស់កូរ៉េខាងត្បូង (JCS) បាននិយាយនៅក្នុងសេចក្តីថ្លែងការណ៍មួយថា មីស៊ីលដែលបាញ់ចេញពីឆ្នេរសមុទ្រភាគនិរតីនៃទីក្រុង Jangyon បានហោះកាត់ប្រទេសកូរ៉េខាងជើង មុនពេលវាធ្លាក់ចូលក្នុងដែនទឹក ពីឆ្នេរសមុទ្រភាគខាងកើតរបស់ប្រទេស ។

បើយោងតាមចម្ងាយហោះហើររបស់មីស៊ីលដែលត្រូវបានរាយការណ៍នេះបង្ហាញថា មីស៊ីលនេះគឺតម្រង់គោលដៅទីតាំងរបស់ទាហានអាមេរិកប្រហែល ២៨,០០០ នាក់ដែលកំពុងឈរជើងនៅក្នុងប្រទេសកូរ៉េខាងត្បូង ហើយយោធាកូរ៉េខាងត្បូងបានហៅ ការបាញ់នេះថាជា “ការបង្កហេតុដ៏ធ្ងន់ធ្ងរ” ដែលបំផ្លាញស្ថិរភាពនៅលើឧបទ្វីបកូរ៉េ ។

ទន្ទឹមនោះ ទីបញ្ជាការឥណ្ឌូប៉ាស៊ីហ្វិករបស់សហរដ្ឋអាមេរិកបាននិយាយថា ការបាញ់មីស៊ីលរបស់កូរ៉េខាងជើងកាលពីពេលថ្មីៗនេះ គឺបង្ហាញពីអស្ថិរភាពនៃកម្មវិធីអាវុធខុសច្បាប់របស់ទីក្រុងព្យុងយ៉ាង ហើយអាមេរិកនៅតែមានការប្តេជ្ញាចិត្តផ្នែកសន្តិសុខចំពោះកូរ៉េខាងត្បូង និងជប៉ុនដដែល ។

គួរបញ្ជាក់ថា សហរដ្ឋអាមេរិក និងកូរ៉េខាងត្បូងបានចាប់ផ្ដើមធ្វើសមយុទ្ធយោធាទ្រង់ទ្រាយធំប្រចាំឆ្នាំ Freedom Shield មិនធ្លាប់មានក្នុងរយៈពេល ៥ ឆ្នាំ ដើម្បីបង្ហាញពីការរៀបចំសេណារីយ៉ូសង្គ្រាមថ្មី ដែលឆ្លុះបញ្ចាំងពីការផ្លាស់ប្តូរបរិយាកាសសន្តិសុខ ដូចជា ការគំរាមកំហែងនុយក្លេអ៊ែររបស់កូរ៉េខាងជើង និងសង្រ្គាមនៅអ៊ុយក្រែនជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ France 24

ចុចអាន ៖ ២ ខែទៀត រថក្រោះខ្លារខិន Leopard 1 ពី ៨០ ទៅ ៩០ គ្រឿងនឹងទៅដល់ដៃ អ៊ុយក្រែន