កម្ពុជារំពឹងថា ផ្លូវរថភ្លើង ចិន-ឡាវ នឹងជួយជំរុញទេសចរកម្ពុជា

រដ្ឋមន្ត្រីក្រសួងទេសចរណ៍កម្ពុជា លោក ថោង ខុន បាននិយាយថា កម្ពុជារំពឹងថាផ្លូវរថភ្លើង ចិន-ឡាវ នឹងជួយនាំភ្ញៀវទេសចរបរទេសមកកាន់ប្រទេសកម្ពុជាកាន់តែច្រើននាពេលអនាគត។

ផ្លូវរថភ្លើងល្បឿនលឿនដែលតភ្ជាប់ពីទីក្រុងគុនមីងខេត្តយូណានប្រទេសចិន ជាមួយទីក្រុងវៀងច័ន្ទប្រទេសឡាវ បានបើកឱ្យដំណើរការប្រើប្រាស់ជាផ្លូវការចាប់តាំងពីខែធ្នូ ឆ្នាំ២០២១។

លោក ថោង ខុន ដែលបច្ចុប្បន្នកំពុងបំពេញទស្សនកិច្ចរយៈពេល ៤ថ្ងៃនៅប្រទេសឡាវបាននិយាយថា លោកបានធ្វើដំណើរតាមផ្លូវរថភ្លើងល្បឿនលឿន ចិន-ឡាវ ជាលើកដំបូងពីទីក្រុងវៀងច័ន្ទទៅទីក្រុងហ្លួងព្រះបាង។

លោក ថោង ខុន និយាយថា៖ “ការធ្វើដំណើរដោយរថភ្លើងល្បឿនលឿនគឺមានសុវត្ថិភាព ហើយតម្លៃសំបុត្រក៏ថោកផងដែរ។ អ្នកដំណើរជនជាតិឡាវ និងជនជាតិថៃជាច្រើនធ្វើដំណើរដោយរថភ្លើងនេះទៅកាន់ប្រទេសចិន ហើយអ្នកធ្វើដំណើរចិនជាច្រើនក៏ធ្វើដំណើរមកកាន់ប្រទេសឡាវ និងប្រទេសថៃដោយរថភ្លើងនេះដូចគ្នាដែរ។ នេះជាអ្វីដែលធ្វើឱ្យលោកមានក្តីរំពឹងថា ផ្លូវរថភ្លើងនេះនឹងជួយនាំភ្ញៀវទេសចរមកកាន់កម្ពុជាកាន់តែច្រើននាពេលអនាគត។ ឆ្នាំនេះយើងសង្ឃឹមថានឹងទាក់ទាញភ្ញៀវទេសចរចិនរវាងពី ៨០ម៉ឺន ទៅ ១លាននាក់”។

ប្រភពព័ត៌មានបានបន្តថា វិស័យទេសចរណ៍គឺជាសសរស្តម្ភមួយក្នុងចំណោមសសរស្តម្ភទាំង៤ ដែលជួយដល់សេដ្ឋកិច្ចកម្ពុជា។ ប្រទេសកម្ពុជា មានបេតិកភណ្ឌពិភពលោកចំនួន ៣កន្លែង គឺប្រសាទអង្គរវត្តស្ថិតនៅខេត្តសៀមរាប ប្រាសាទព្រះវិហារ ស្ថិតនៅខេត្តព្រះវិហារ និងរមណីយដ្ឋានប្រាសាទសំបូរព្រៃគុក ស្ថិតនៅខេត្តកំពង់ធំ។ ក្រៅពីនេះប្រទេសកម្ពុជាក៏នៅមានឆ្នេរសមុទ្រដ៏គួរឱ្យទាញដល់ភ្ញៀវទេសចរផងដែរ ដែលលាតសន្ធឹងប្រវែង ៤៥០គីឡូម៉ែត្រ គ្របដណ្តប់ខេត្តចំនួន៤ នៅភាគនិរតីរួមមា៖ ខេត្តព្រះសីហនុ ខេត្តកំពត ខេត្តកែប និងខេត្តកោះកុង៕

ប្រែសម្រួល៖ គង់ សំអាន

ប្រភព៖ Mgronline

ចុចអាន៖ ជប៉ុន បើកខ្សែទូរស័ព្ទបន្ទាន់ភ្ជាប់ជាមួយប្រទេសអាស៊ាន

ចុចអាន៖ អស្ចារ្យ! អង្គរវត្ត ជាប់លេខ១លើលោក ជាកន្លែងមើលថ្ងៃរះ ល្អដាច់គេ (មានវីដេអូ)