ព័ត៌មានអន្ដរជាតិ

ចិន បញ្ជូនកងទ័ពជាង ២០០ នាក់ ចូលរួមសមយុទ្ធ “នាគមាស ២០២៣” នៅ កម្ពុជា (មានវីដេអូ)

បានផុស

២ years មុន

នៅ

ថ្ងៃព្រហស្បតិ៍ ១៦ មីនា ២០២៣

ដោយ

ប្រទេសចិនបានបញ្ជូនទាហានជាង ២០០ នាក់មកពីអង្គភាពគាំទ្រកងទ័ពជើងគោក ជើងទឹក និងកងកម្លាំងដឹកជញ្ជូន ក្រោមបញ្ជាការដ្ឋានភូមិភាគខាងត្បូង ដើម្បីចូលរួមក្នុងលំហាត់សមយុទ្ធយោធារួមគ្នាដែលមានឈ្មោះថា “នាគមាស ២០២៣” នៅក្នុងព្រះរាជាណាចក្រកម្ពុជា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លំហាត់សមយុទ្ធយោធារួមគ្នានេះនឹងប្រព្រឹត្តទៅចាប់ពីថ្ងៃទី២០ ខែមីនា ដល់ថ្ងៃទី៨ ខែមេសា នៅឯមូលដ្ឋានហ្វឹកហ្វឺនក្នុងប្រទេសកម្ពុជា ខណៈទាហាន រួមទាំងបរិក្ខារធុនធ្ងន់ និងសម្ភារៈពាក់ព័ន្ធផ្សេងទៀត បានចាកចេញពីកំពង់ផែយោធាក្នុងទីក្រុង Zhanjiang ខេត្ត Guangdong ប្រទេសចិន កាលពីថ្ងៃទី១០ ខែមីនា ហើយនឹងមកដល់កំពង់ផែស្វយ័តក្រុងព្រះសីហនុ រួចផ្លាស់ទៅមូលដ្ឋានហ្វឹកហ្វឺន មុនថ្ងៃទី២០ ខែមីនា ។

សមយុទ្ធយោធារួមគ្នានេះ ត្រូវបានគេរំពឹងថា នឹងពង្រឹងភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយ ចិន-កម្ពុជា ការជឿទុកចិត្តគ្នាទៅវិញទៅមកផ្នែកនយោបាយ និងការផ្លាស់ប្តូរយុទ្ធសាស្ត្ររវាងកងកម្លាំងប្រដាប់អាវុធទាំងពីរផងដែរ ។

ទន្ទឹមនោះ សមយុទ្ធ “នាគមាស ២០២៣” នេះក៏នឹងពង្រឹងសមត្ថភាពរបស់កងកម្លាំងប្រដាប់អាវុធ ចិន-កម្ពុជា ក្នុងការរួមគ្នាប្រយុទ្ធប្រឆាំងនឹងអំពើភេរវកម្ម និងការងារផ្តល់ជំនួយមនុស្សធម៌ជាដើម ។

គួរបញ្ជាក់ថា សម្រាប់លំហាត់សមយុទ្ធ “នាគមាស ២០២៣” នេះគឺជាលើកទី ៥ ហើយដែលកងទ័ព កម្ពុជា-ចិន ធ្វើរួមគ្នានៅលើទឹកដីនៃព្រះរាជាណាចក្រកម្ពុជា ដោយកាលពីលើកទី១ ធ្វើឡើងនៅឆ្នាំ ២០១៦ លើកទី២ នៅឆ្នាំ២០១៨ លើកទី៣ នៅឆ្នាំ ២០១៩ និងលើកទី៤ នៅឆ្នាំ២០២០ ៕