ប្រធានាធិបតីម៉ិកស៊ិក លោក Andrés Manuel López Obrador ​និយាយថា ក្មេងៗនៅអាមេរិក ភាគច្រើនខ្វះភាពកក់ក្តៅទទួលបានពីគ្រួសារបណ្តាលឱ្យពួកគេបានប្រើប្រាស់ថ្នាំ fentanyl ហួសកម្រិត។

លោកបានអះអាងថា គ្រួសារអាមេរិក​ មិនសូវជាខ្វាយខ្វល់ជាមួយកូនៗឡើយ ដោយតម្លៃនៅក្នុងគ្រួសារ ត្រូវបានបែកបាក់គ្នា​ លែងលះប្តីប្រពន្ធ​ ខ្វះភាពជាបងប្អូន ទើបបណ្តាលឱ្យមានវិបត្តិនេះកើតឡើង។ ដោយខុសពីម៉ិកសិក លោក Obrador បញ្ជាក់ ប្រជាជន​ម៉ិកសិក មានភាពស្និតស្នាលជាមួយកូនៗនៅក្នុងគ្រួសារ ទើបមិនបណ្តាលឱ្យមានការប្រើប្រាស់ fentanyl ជ្រុល។

ពាក់ព័ន្ធជាមួយថ្នាំ Fentanyl, អាមេរិកថា ភាគច្រើនជាថ្នាំក្លែងក្លាយ ដែលត្រូវបានផលិតនៅក្នុងមន្ទីរពិសោធន៍សម្ងាត់នៅក្នុងម៉ិកសិក។ ជាមួយស្ថិតិថ្មី អ្នកជំនាញអាមេរិក បានបន្ទោសក្រុមជួញដូរគ្រឿងញៀនម៉ិកស៊ិកចំពោះការជួញដូរថ្នាំអាភៀនសំយោគធ្វើឱ្យស្លាប់មនុស្សជាង ៧ម៉ឺននាក់ ក្នុងមួយឆ្នាំៗនៅអាមេរិក។  

សូមបញ្ជាក់ថា Fentanyl គឺជាថ្នាំអាភៀនសំយោគដ៏ខ្លាំងក្លាដែលត្រូវបានអនុម័តដោយរដ្ឋបាលចំណីអាហារ និងឱសថសម្រាប់ប្រើជាថ្នាំស្ពឹកបំបាត់ការឈឺចាប់។ វាមានកម្លាំងខ្លាំងជាង morphine ប្រហែល ១០០ ដង និងខ្លាំងជាងហេរ៉ូអ៊ីន ៥០ដងឯណោះ៕

ប្រែសម្រួល៖ នាង​ រតនៈ

ប្រភព៖ Sputnik

ចុចអាន៖ នៅសុខៗ លោក ត្រាំ ប្រកាសថា គាត់នឹងត្រូវចាប់ខ្លួន ដោយសារហេតុផលតែមួយគត់