ចិន នឹងធ្វើការជាមួយ រុស្ស៊ី ដើម្បីលើកកម្ពស់ពិភពលោកពហុប៉ូល និងលទ្ធិប្រជាធិបតេយ្យ

ប្រធានាធិបតីចិនលោក ស៊ី ជីនពីង បាននិយាយកាលពីថ្ងៃចន្ទថា ទីក្រុងប៉េកាំងនឹងធ្វើការជាមួយប្រទេសរុស្ស៊ីដើម្បី “លើកកម្ពស់ពិភពលោកពហុប៉ូល” ។

នៅក្នុងដំណើរទស្សនកិច្ចទៅកាន់ប្រទេសរុស្ស៊ី លោក ស៊ី បាននិយាយថា “ប្រទេសចិននឹងធ្វើការជាមួយប្រទេសរុស្ស៊ីដើម្បីលើកកម្ពស់ពហុភាគីនិយមពិតប្រាកដ លើកកម្ពស់ពិភពលោកពហុប៉ូល និងលទ្ធិប្រជាធិបតេយ្យកាន់តែច្រើននៅក្នុងទំនាក់ទំនងអន្តរជាតិ និងជួយធ្វើឲ្យអភិបាលកិច្ចពិភពលោកកាន់តែមានភាពយុត្តិធម៌ និងសមធម៌ផងដែរ” ។

ប្រធានាធិបតីចិនបានលើកឡើងថា “ការរីកចម្រើននៃទំនាក់ទំនងចិន-រុស្ស៊ី មិនត្រឹមតែនាំមកនូវផលប្រយោជន៍ជាក់ស្តែងដល់ប្រជាជនទាំងពីរប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ដល់ការអភិវឌ្ឍន៍ និងវឌ្ឍនភាពនៃពិភពលោកផងដែរ” ។

ទន្ទឹមនោះ លោក ស៊ី មានទំនុកចិត្តថា ដំណើរទស្សនកិច្ចនេះនឹងផ្តល់លទ្ធផលជាផ្លែផ្កា ហើយបញ្ចូលកម្លាំងជំរុញថ្មីទៅក្នុងភាពរឹងមាំ និងការរីកចម្រើនឥតឈប់ឈរនៃភាពជាដៃគូយុទ្ធសាស្ត្រគ្រប់ជ្រុងជ្រោយ ក៏ដូចជាសម្រាប់ការសម្របសម្រួលរវាងចិន និងរុស្ស៊ីនៃយុគសម័យថ្មីផងដែរ” ។

ជាចុងក្រោយ លោក ស៊ី ក៏បានសម្ដែងនូវសេចក្ដីសប្បាយរីករាយជាខ្លាំងក្នុងការឈានជើងជាន់លើទឹកដីរុស្ស៊ីម្ដងទៀត ក្នុងដំណើរបំពេញទស្សនកិច្ចផ្លូវរដ្ឋមកកាន់ទីក្រុងមូស្គូ តាមការអញ្ជើញរបស់លោកប្រធានាធិបតី វ្ល៉ាឌីមៀរ ពូទីន ។

គួរបញ្ជាក់ថា លោក ស៊ី ជីនពីង នឹងបំពេញទស្សនកិច្ចផ្លូវរដ្ឋរយៈពេល ៣ ថ្ងៃនៅក្នុងទីក្រុងមូស្គូ ហើយវាក៏ជាដំណើរទស្សនកិច្ចលើកដំបូងរបស់លោកផងដែរ ចាប់តាំងពីរុស្ស៊ីបានចាប់ផ្ដើមប្រតិបត្តិការសឹកនៅអ៊ុយក្រែនកាលពីខែកុម្ភៈ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក ពូទីន ពិនិត្យយ៉ាងល្អិតល្អន់លើសំណើរ ១២ ចំណុចរបស់ ចិន ស្ដីពីជម្លោះនៅ អ៊ុយក្រែន