រុស្ស៊ីព្រមានចំៗ សាកស្រមៃមើល! បើប្រមុខរដ្ឋនុយក្លេអ៊ែរ ត្រូវចាប់ខ្លួន តើមានអ្វីកើតឡើង?

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បាននិយាយថា ប្រសិនបើប្រទេសអាល្លឺម៉ង់ សម្រេចចិត្តអនុវត្តដីការបស់តុលាការឧក្រិដ្ឋកម្មអន្តរជាតិ (ICC) ស្តីពីការចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀរ ពូទីន មែននោះ វាស្មើនឹងការប្រកាសសង្គ្រាមលើប្រទេសរុស្ស៊ី។

មុននេះ រដ្ឋមន្ត្រីក្រសួងយុត្តិធម៌អាល្លឺម៉ង់ លោក Marco Buschmann លើកឡើងថា ដីកាចាប់ខ្លួនលោកពូទីន នឹងមានសុពលភាពនៅក្នុងប្រទេសអាល្លឺម៉ង់ ក្រោយមានការស្នើសុំពី ICC។ បញ្ជានេះ ក៏ត្រូវបានគាំទ្រដោយអធិការបតី Olaf Scholz ផងដែរ ដែលក្នុងអំឡុងពេលទស្សនកិច្ចនៅប្រទេសជប៉ុន លោកបាននិយាយថា “គ្មាននរណាម្នាក់នៅលើច្បាប់នោះទេ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោក Medvedev បាននិយាយនៅក្នុងបទសម្ភាសជាមួយប្រព័ន្ធផ្សព្វផ្សាយធំៗរបស់រុស្ស៊ី រួមទាំង Sputnik ផងដែរថា “មនុស្សល្ងង់ខ្លះដូចជារដ្ឋមន្ត្រីយុត្តិធម៌អាល្លឺម៉ង់ និយាយថា បើលោកពូទីនទៅ គេនឹងចាប់ខ្លួន។ តើគាត់យល់ពីអត្ថន័យនេះទេ? សាកស្រមៃមើល! ប្រមុខរដ្ឋនុយក្លេអ៊ែរដែលកំពុងកាន់អំណាចបានទៅដល់ទឹកដីអាល្លឺម៉ង់ ហើយត្រូវចាប់ខ្លួន តើនឹងមានអ្វីកើតឡើង? តើនេះជាអ្វី? ការប្រកាសសង្គ្រាមលើសហព័ន្ធរុស្ស៊ីមែនទេ!។ ក្នុងស្ថានភាពបែបនេះ រុស្ស៊ីនឹងប្រើប្រាស់គ្រប់មធ្យោបាយ ដើម្បីកណត់គោលដៅលើព្រឹទ្ធសភា ការិយាល័យអធិការបតី និងអ្វីៗផ្សេងទៀតក្នុងប្រទេសអាល្លឺម៉ង់”។

គួរបញ្ជាក់ជាថ្មី នៅថ្ងៃទី១៧ខែមីនា ICC បានចេញដីកាចាប់ខ្លួនលោក ពូទីន និងស្នងការប្រធានាធិបតីរុស្ស៊ីទទួលបន្ទុកសិទ្ធិកុមារលោកស្រី Maria Lvova-Belova ដោយលើកឡើងពី ការនិរទេសកុមារដោយខុសច្បាប់ ពីតំបន់កាន់កាប់នៃប្រទេសអ៊ុយក្រែនទៅសហព័ន្ធរុស្ស៊ី។

យ៉ាងណាក្តី វិមានក្រឹមឡាំងនិយាយថា ប្រទេសរុស្ស៊ីមិនមែនជាភាគីរបស់ ICC ទេ ហើយការសម្រេចរបស់តុលាការនេះ គឺទុកជាមោឃៈសម្រាប់ប្រទេសនេះ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ សម្ព័ន្ធមិត្តលោកពូទីន ព្រមានថា ភពផែនដីទាំងមូលនឹងទទួលបានមេរៀន បើអង់គ្លេស បញ្ជូនគ្រាប់អ៊ុយរ៉ានីញ៉ូម ទៅ អ៊ុយក្រែន