WhatsApp ពន្យារពេលធ្វើបច្ចុប្បន្នភាពគោលការណ៍ឯកជនថ្មី

ក្រុមហ៊ុនបានប្រកាសកាលពីថ្ងៃសុក្រថា កម្មវិធី WhatsApp បានពន្យារពេលការធ្វើបច្ចុប្បន្នភាពគោលការណ៍ឯកជនថ្មីរបស់ខ្លួនចាប់ពីថ្ងៃទី ៨ ខែកុម្ភៈដល់ថ្ងៃទី ១៥ ខែឧសភា ។

កម្មវិធីផ្ញើសារដ៏មានប្រជាប្រិយនេះបាននិយាយនៅក្នុងសេចក្តីថ្លែងការណ៍មួយថា មានព័ត៌មានមិនពិតដែលកំពុងបង្កការព្រួយបារម្ភ បន្ទាប់ពីអ្នកប្រើប្រាស់បានចាប់ផ្តើមផ្លាស់ប្តូរទៅប្រើជម្រើសផ្សេង ពីព្រោះច្បាប់គោលការណ៍ភាពឯកជនថ្មីរបស់ខ្លួនបានបង្ខំពួកគេឲ្យទទួលយកការចែករំលែកទិន្នន័យផ្ទាល់ខ្លួនជាមួយក្រុមហ៊ុន Facebook ។

ក្រុមហ៊ុនបាននិយាយថា “យើងនឹងការពារការសន្ទនាផ្ទាល់ខ្លួនរបស់អ្នកពីលួចណាមួយ ដូច្នេះ WhatsApp និង Facebook មិនអាចមើលឃើញសារឯកជនទាំងនេះទេ ។ យើងក៏មិនអាចមើលឃើញទីតាំងចែករំលែករបស់អ្នកដែរ ហើយយើងក៏មិនចែករំលែកទំនាក់ទំនងរបស់អ្នកដែរជាមួយ Facebook ផងដែរ” ។

សេចក្តីថ្លែងការណ៍បានកត់សម្គាល់ថា ការធ្វើបច្ចុប្បន្នភាពថ្មីនឹងមិនផ្លាស់ប្តូរប្រព័ន្ធផ្ញើសារនោះទេ ។

ក្រុមហ៊ុនបានបន្ថែមទៀតថា “ផ្ទុយទៅវិញការធ្វើបច្ចុប្បន្នភាពរួមមានជម្រើសថ្មីផងដែរដែលមនុស្សនឹងត្រូវផ្ញើសារអាជីវកម្មនៅលើ WhatsApp និងផ្តល់នូវតម្លាភាពបន្ថែមទៀតអំពីរបៀបដែលយើងប្រមូល និងប្រើប្រាស់ទិន្នន័យ” ។

វាបានគូសបញ្ជាក់ថា ការធ្វើបច្ចុប្បន្នភាពមិនផ្លាស់ប្តូរសមត្ថភាពរបស់ WhatsApp ក្នុងការចែករំលែកទិន្នន័យជាមួយ Facebook ទេ ខណៈគណនីរបស់អ្នកប្រើប្រាស់ក៏នឹងមិនត្រូវបានផ្អាក ឬលុបចោលនៅថ្ងៃទី ៨ ខែកុម្ភៈ ផងដែរ ។

ក្រុមហ៊ុនបាននិយាយថា “យើងក៏នឹងធ្វើអ្វីៗជាច្រើនទៀតដើម្បីបញ្ចោញព័ត៌មានមិនពិតអំពីរបៀបដែលភាពឯកជន និងប្រព័ន្ធសុវត្ថិភាពដំណើរការលើ WhatsApp ផងដែរ ។ បន្ទាប់មកយើងនឹងពិនិត្យគោលការណ៍នេះឡើងវិញ មុនពេលជម្រើសអាជីវកម្មថ្មីរួចរាល់នៅថ្ងៃទី ១៥ ឧសភា” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ តើតារាល្បីៗអាមេរិករូបណាខ្លះនឹងចូលរួមពិធីឡើងកាន់តំណែងរបស់លោក Biden?

ចុចអាន ៖ ប្រធានសភាអាមេរិកព្រមានសមាជិកណាដែលសមគំនិតក្នុងកុបកម្មវិមានកាពីតូលប្រឈមនឹងការកាត់ទោស