ប៉ូឡូញ សន្យាផ្តល់ យន្តហោះចម្បាំងបន្ថែមទៀតទៅឲ្យ អ៊ុយក្រែន (មានវីដេអូ)

ប្រធានាធិបតីអ៊ុយក្រែនលោក Volodymyr Zelensky បានទៅបំពេញទស្សនកិច្ចនៅប្រទេសប៉ូឡូញ ខណៈម្ចាស់ផ្ទះសន្យាថា​ នឹងបញ្ជូនយន្តហោះចម្បាំងបន្ថែមទៀតទៅឲ្យទីក្រុងកៀវ។

ប្រធានាធិបតីប៉ូឡូញលោក Andrzej Duda និយាយថា លោកនឹងបញ្ជូនយន្តហោះចម្បាំង MiG-29 សម័យសូវៀតដែលនៅសេសសល់របស់ប៉ូឡូញ ប្រសិនបើអ៊ុយក្រែន នៅតែត្រូវការ។

លោក Duda បានអះអាងជាថ្មីថា ប្រទេសនេះ គាំទ្រយ៉ាងមុតមាំចំពោះការប៉ុនប៉ងរបស់ទីក្រុង កៀវ ក្នុងការចូលរួមជាមួយអង្គការណាតូ ហើយលោកកំពុងព្យាយាមធ្វើកិច្ចការដើម្បីទទួលបានការធានាសន្តិសុខ ដែលនឹងពង្រឹងសក្តានុពលយោធារបស់អ៊ុយក្រែន។

ស្របពេលជាមួយគ្នានោះដែរ លោក Zelensky បានថ្លែងអំណរគុណដល់ប្រទេសប៉ូឡូញសម្រាប់ការគាំទ្ររបស់ខ្លួន ប្រឆាំងនឹងការវាយលុករបស់រុស្ស៊ី។

គួរបញ្ជាក់ថា លោក Zelensky បានទៅដល់ទីក្រុង វ៉ាសូវី កាលពីព្រឹកថ្ងៃពុធទី០៥ខែមេសា ក្នុងដំណើរទស្សនកិច្ចផ្លូវការលើកដំបូងរបស់លោកទៅកាន់ប្រទេសប៉ូឡូញ ចាប់តាំងពីរុស្ស៊ី បើកការវាយលុកអ៊ុយក្រែនកាលពីឆ្នាំមុន។

ប៉ូឡូញ គឺ​ជា​សម្ព័ន្ធមិត្ត​ដ៏​សំខាន់ដែល​គាំទ្រ​អ៊ុយក្រែន ហើយតែងតែជាប្រទេសឈានមុខគេមួយ ​ក្នុង​ការ​​ផ្គត់ផ្គង់សព្វា​អាវុធ​ដល់​ប្រទេស​ជិតខាង។ ប៉ូឡូញក៏ជាប្រទេសដំបូងគេដែលសន្យាផ្តល់រថក្រោះ Leopard 2 ដល់អ៊ុយក្រែនផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ប៉ូឡូញ ក្លាយជាប្រទេសណាតូ ទី១ ដែលបញ្ជូនយន្តហោះចម្បាំងសម័យសូវៀត ទៅឲ្យ អ៊ុយក្រែន