មកដឹងស្ថានភាពក្ងោក ស ដែលមានតែមួយគត់នៅ អង់គ្លេស ក្រោយត្រូវរថយន្តបុក

សត្វក្ងោកពណ៌សដ៏កម្រមួយក្បាលដែលគេស្គាល់ថាជា “តារាប្រចាំតំបន់” នៅឧទ្យាន Normanby Hall នៃតំបន់ North Lincolnshire របស់ចក្រភពអង់គ្លេស ដែលត្រូវបានឡានបុក ហើយរត់គេចខ្លួនកាលពីថ្ងៃទី២០ ខែមេសា និងមានរបួសធ្ងន់ ពេលនេះស្ថិតក្នុងស្ថានភាពសុវត្ថិភាពវិញហើយ ក្រោយទទួលការព្យាបាលពីក្រុមគ្រូពេទ្យ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំបូងឡើយមានការសន្និដ្ឋានថា ការបើកបុកសត្វក្ងោកសនេះ ជាករណីប៉ុនប៉ង ឬចេតនា ប៉ុន្តែអ្នកនាំពាក្យរបស់ប៉ូលិសតំបន់ Humberside បានឆ្លើយតបថា វាជាករណីអចេតនាប៉ុណ្ណោះ ហើយបើយោងតាមការ​ស៊ើប​អង្កេតបាន​រក​ឃើញទៀត​ថា ​សត្វក្ងោកដ៏កម្រនេះបានដើរចូលរថយន្តដោយខ្លួនវា ហើយក៏ត្រូវរថយន្តបុក និងបណ្ដាលឲ្យរបួស ក និងជើង ។

ទោះជាយ៉ាងណា ក្ងោកសដ៏កម្រអាយុ ៤ ឆ្នាំមួយក្បាលនេះកំពុងទទួលការព្យាបាលយ៉ាងយកចិត្តទុកដាក់ពីសំណាក់ក្រុមគ្រូពេទ្យសត្វរបស់អង់គ្លេស ។

សូមបញ្ជាក់ដែរថា ក្ងោកសនេះមានតែមួយគត់នៅតំបន់នោះ ហើយវារស់នៅជាមួយក្ងោកធម្មតា ២ ក្បាលទៀត ជាពិសេសបុគ្គលិកក្នុងឧទ្យាននោះស្រលាញ់វាណាស់ ដោយសារអាកប្បកិរិយាស្លូតបូតខុសពីសត្វដទៃ ៕

ប្រភព ៖ BBC