ការ​ចំណាយ​លើ​វិស័យ​យោធា​​ពិភពលោក​ ឈានដល់កម្រិតខ្ពស់ជាប្រវត្តិសាស្រ្ត

ការចំណាយលើវិស័យយោធាជាសកល បានកើនឡើងដល់កម្រិតខ្ពស់ជាប្រវត្តិសាស្រ្តកាលពីឆ្នាំមុន ដែលជំរុញដោយគោលនយោបាយរបស់អឺរ៉ុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យាស្ថានស្រាវជ្រាវសន្តិភាពអន្តរជាតិទីក្រុងស្តុកខុល (SIPRI) បានប្រកាសនៅថ្ងៃចន្ទទី២៤ខែមេសាថា ការចំណាយលើវិស័យការពារជាតិ បានកើនឡើង៣,៧% ពោលគឺឈានដល់កម្រិតខ្ពស់បំផុតក្នុងទំហំទឹកប្រាក់ ២.២៤ទ្រីលានដុល្លារក្នុងឆ្នាំ២០២២។ ប្រហែលពាក់កណ្តាលនៃការកើនឡើងប្រចាំឆ្នាំ គឺដោយសារតែកញ្ចប់ថវិកាយោធារបស់អ៊ុយក្រែន។

ថវិកា​សព្វាវុធ​ កំពុង​ពង្រីក​ពាសពេញទ្វីប​អឺរ៉ុប ​ដើម្បី​ឆ្លើយតប​នឹង​ការវាយលុក​របស់​រុស្ស៊ី ខណៈ​ភាព​តានតឹង​នៅ​អាស៊ី​បូព៌ា​ ក៏កំពុងជំរុញឲ្យ​មាន​ការចំណាយ​កាន់តែ​ច្រើន​ផងដែរ។

អ្នកស្រាវជ្រាវជាន់ខ្ពស់របស់ SIPRI លោក Nan Tian បាននិយាយនៅក្នុងសេចក្តីថ្លែងការណ៍មួយថា “ការកើនឡើងជាបន្តបន្ទាប់ នៃការចំណាយលើវិស័យយោធាពិភពលោកក្នុងរយៈពេលប៉ុន្មានឆ្នាំចុងក្រោយនេះ គឺជាសញ្ញាមួយបង្ហាញថា យើងកំពុងរស់នៅក្នុងពិភពលោកដែលមានអសន្តិសុខកាន់តែខ្លាំងឡើង។ រដ្ឋនានាកំពុងពង្រឹងកម្លាំងយោធា ដើម្បីឆ្លើយតបទៅនឹងបរិយាកាសសន្តិសុខដែលកាន់តែយ៉ាប់យ៉ឺន”។

ហ្វាំងឡង់និងស៊ុយអែត ស្ថិតក្នុងចំណោមប្រទេសដែលបង្កើនការចំណាយច្រើនជាងគេ ដោយការទិញយន្តហោះចម្បាំង F-35 របស់ហ្វាំងឡង់ បានរួមចំណែកដល់ការកើនឡើង ៣៦%។

ទន្ទឹមនឹងនោះ ថវិកាការពារជាតិរបស់សមាជិកណាតូដែលមានស្រាប់ គឺបានកើនឡើង០,៩% ពីឆ្នាំ២០២១។ នៅតំបន់មជ្ឈិមបូព៌ា, ប្រទេសអារ៉ាប៊ីសាអូឌីត បានបង្កើនការចំណាយរបស់ខ្លួនប្រមាណ១៦% ក្លាយជាអ្នកចំណាយធំជាងគេលំដាប់ទី៥លើពិភពលោក។

ដោយឡែក ប្រទេសកាតា បានបង្កើនការចំណាយ២៧%។ ទោះបីជាយ៉ាងណាក៏ដោយ សហរដ្ឋអាមេរិក នៅតែជាប្រទេសចំណាយច្រើនជាងគេបំផុតក្នុងពិភពលោក៕

ប្រែសម្រួល៖ Vann Vann

ប្រភព៖ Brunswick News

ចុចអាន៖ អាមេរិក ប្រកាសបង្កើនការចំណាយយោធា ធំបំផុតក្នុងប្រវត្តិសាស្រ្ត