មកដឹងតម្លៃអគ្គិសនីនៅ ថៃ ស្របពេលជិតបោះឆ្នោត

យោងតាមគណៈកម្មការគ្រប់គ្រងអគ្គិសនីថៃ (ERC) បានឲ្យដឹងថា ចាប់ពីខែឧសភា ឆ្នាំ២០២៣ នេះទៅ តម្លៃអគ្គិសនីក្នុងប្រទេសនឹងកំណត់ថ្លៃចំនួន ០.១៣ ដុល្លារ (៥៥០ រៀល) ក្នុងមួយគីឡូវ៉ាត់ ស្របពេលដែលការបោះឆ្នោតសកលជិតឈានចូលមកដល់ ។

លោក Komkrit Tantravanich អគ្គលេខាធិការ ERC បានឲ្យដឹងថា ការកំណត់តម្លៃនេះបានកើតឡើង បន្ទាប់ពីគណៈកម្មការគ្រប់គ្រងអគ្គិសនីបានអនុម័តលើសំណើពិនិត្យពីក្រសួងថាមពល ក្រោយពេលដែលលោកនាយករដ្ឋមន្រ្តី ប្រាយុទ្ធ ចាន់អូចា បញ្ជាឲ្យក្រសួង ធ្វើការឆ្លើយតបជាបន្ទាន់ចំពោះការត្អូញត្អែររបស់សាធារណជន អំពីការឡើងថ្លៃអគ្គិសនីខ្ពស់ខុសពីធម្មតា ។

ទន្ទឹមនោះ បន្ទាប់ពីកិច្ចប្រជុំគណៈរដ្ឋមន្ត្រីប្រចាំសប្តាហ៍កាលពីថ្ងៃអង្គារ លោក ប្រាយុទ្ធ បានប្រកាសថា រដ្ឋាភិបាលរបស់លោកគ្រោងនឹងបែងចែកប្រាក់ជាង ១១ ពាន់លានបាត ដើម្បីផ្តល់ការឧបត្ថម្ភថ្លៃអគ្គិសនីដល់អ្នកដែលមានប្រាក់ចំណូលទាបសម្រាប់រយៈពេល ៤ ខែទៀត ចាប់ពីខែឧសភាតទៅ ។

លោក​បាន​បន្ត​ថា រដ្ឋាភិបាល​ក៏​នឹង​ផ្តល់​ការ​កាត់​បន្ថយចំនួន ៤.៤០ ដុល្លារនៃពន្ធលើតម្លៃបន្ថែម ​ដល់​គ្រួសារ​ដែល​ប្រើ​អគ្គិសនី​មិន​លើស​ពី ៥០០ គីឡូវ៉ាត់ផងដែរ ។

គួរបញ្ជាក់ថា ប្រទេសថៃនឹងរៀបចំការបោះឆ្នោតសកលនាថ្ងៃទី១៤ ខែឧសភា ខាងមុខនេះ ហើយអ្នកបោះឆ្នោតថៃនឹងត្រូវគូសលើសន្លឹកឆ្នោតចំនួន ២ គឺសន្លឹកឆ្នោតមួយសម្រាប់បេក្ខជននៅក្នុងមណ្ឌល និងសន្លឹកឆ្នោតមួយទៀត សម្រាប់គណបក្សនយោបាយដែលពួកគេពេញចិត្ត ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ លោក ប្រាយុទ្ធ ៖ ឈ្នះឆ្នោតក៏សង្ឃឹម តែបើចាញ់វិញ ក៏ត្រៀមខ្លួនទៅផ្ទះដែរ