ព័ត៌មានអន្ដរជាតិ

លោក ប្រាយុទ្ធ ៖ ឈ្នះឆ្នោតក៏សង្ឃឹម តែបើចាញ់វិញ ក៏ត្រៀមខ្លួនទៅផ្ទះដែរ

បានផុស

៣ years មុន

នៅ

ថ្ងៃពុធ ២៦ មេសា ២០២៣

ដោយ

នាយករដ្ឋមន្ត្រីដែលកំពុងកាន់អំណាចរបស់ថៃ លោក ប្រាយុទ្ធ ចាន់អូចា បានបង្ហាញទំនុកចិត្តថា គណបក្សថៃរួបរួមជាតិ (UTN) របស់លោកនឹងឈ្នះអាសនៈគ្រប់គ្រាន់នៅក្នុងការបោះឆ្នោតនាពេលខាងមុខ សម្រាប់លោកបន្តធ្វើជានាយករដ្ឋមន្ត្រី ។

ប៉ុន្តែនៅពេលត្រូវបានសួរថាតើ លោកនឹងលាលែងពីការងារនយោបាយដែរឬទេ ប្រសិនបើគណបក្សរបស់លោក និងសម្ព័ន្ធមិត្តមិនអាចប្រមូលបានការគាំទ្រគ្រប់គ្រាន់ដើម្បីបង្កើតក្រុមចម្រុះនោះ, លោក ប្រាយុទ្ធ បានឆ្លើយថា “លោកត្រៀមខ្លួនរួចជាស្រេចហើយ ក្នុងការទទួលយកលទ្ធផលបោះឆ្នោត ទោះក្នុងលក្ខខណ្ឌណាក៏ដោយ ហើយប្រសិនបើលោកចាញ់ឆ្នោត លោកនឹងត្រឡប់ទៅផ្ទះវិញ” ។

ថ្លែងនៅក្នុងបទសម្ភាសន៍ផ្តាច់មុខជាមួយសារព័ត៌មាន Thai PBS, នាយករដ្ឋមន្ត្រីដែលផុតអាណត្តិរូបនេះបានចង្អុលបង្ហាញថា ដោយផ្អែកលើការស្ទង់មតិនាពេលថ្មីៗនេះ គណបក្សថៃរួបរួមជាតិ (UTN) របស់លោកបាននិងកំពុងទទួលបានការចាប់អារម្មណ៍ខ្លាំងផងដែរ ។

លោក ប្រាយុទ្ធ គឺជាបេក្ខជននាយករដ្ឋមន្ត្រីនៃគណបក្សថៃរួបរួមជាតិ (UTN) ប៉ុន្តែមិនបានឈរឈ្មោះជាសមាជិកសភានោះទេ ។ គណបក្សនយោបាយនីមួយៗមានសិទ្ធិស្នើបេក្ខភាពនាយករដ្ឋមន្ត្រីរហូតដល់ទៅ ៣ រូបក្នុងការបោះឆ្នោត ប៉ុន្តែត្រូវតែទទួលបានអាសនៈសភាយ៉ាងតិច ២៥ អាសនៈ ទើបការតែងតាំងរបស់ខ្លួនមានប្រសិទ្ធភាព ។

នាយករដ្ឋមន្ត្រីដែលផុតអាណត្តិរូបនេះបានបញ្ជាក់ថា “ខ្ញុំមានទំនុកចិត្ត យើងនឹងឈ្នះយ៉ាងហោចណាស់ ២៥ អាសនៈ ប៉ុន្តែវាអាស្រ័យលើថាតើ ប្រជាជននឹងផ្តល់សំឡេងឲ្យខ្ញុំគ្រប់គ្រាន់ដើម្បីបន្តធ្វើជានាយករដ្ឋមន្ត្រីឬអត់ ។ បើមិនដូច្នេះទេ អ្នកផ្សេងនឹងចូលមកជំនួសកន្លែងខ្ញុំហើយ” ។

គួរបញ្ជាក់ថា នៅក្នុងការបោះឆ្នោតនាថ្ងៃទី១៤ ខែឧសភា ខាងមុខនេះ អ្នកបោះឆ្នោតថៃនឹងត្រូវគូសលើសន្លឹកឆ្នោតចំនួន ២ គឺសន្លឹកឆ្នោតមួយសម្រាប់បេក្ខជននៅក្នុងមណ្ឌល និងសន្លឹកឆ្នោតមួយទៀត សម្រាប់គណបក្សនយោបាយដែលពួកគេពេញចិត្ត ខណៈក្រៅពីលោក ប្រាយុទ្ធ ក្នុងនោះក៏នៅមានបេក្ខភាពលេចធ្លោចំនួន ២ រូបផ្សេងទៀតផងដែរ រួមមានកូនស្រីលោក ថាក់ស៊ីន គឺលោកស្រី ផេថងថាន ស៊ីណាវ៉ាត់ត្រា និងលោក ប្រាវីត វង់ស៊ូវ៉ាន់ ជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ អ្នកវិភាគ ថៃ ទស្សន៍ទាយពីបក្សនយោបាយដែលឈ្នះការបោះឆ្នោតខាងមុខ