អាមេរិក និងកូរ៉េខាងត្បូង ប្រកាសធ្វើសមយុទ្ធបាញ់គ្រាប់ពិតទ្រង់ទ្រាយធំបំផុត ក្នុងប្រវត្តិសាស្ត្រ

ក្រសួងការពារជាតិកូរ៉េខាងត្បូង បានប្រកាសកាលពីថ្ងៃសៅរ៍ទី៦ខែឧសភាថា កូរ៉េខាងត្បូង និងសហរដ្ឋអាមេរិក នឹងធ្វើសមយុទ្ធបាញ់គ្រាប់ពិតទ្រង់ទ្រាយធំបំផុតមិនធ្លាប់មានក្នុងប្រវត្តិសាស្ត្ររបស់ពួកគេ នៅខួបលើកទី៧០នៃសន្ធិសញ្ញាការពារជាតិរវាងប្រទេសទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធ ដែលនឹងត្រូវធ្វើឡើងចំនួនប្រាំដងចន្លោះពីថ្ងៃទី២៥ខែឧសភាដល់ថ្ងៃទី១៥ខែមិថុនា គឺនឹងក្លាយជាសមយុទ្ធទ្រង់ទ្រាយធំបំផុត ដែលរួមមានយន្តហោះចម្បាំងបំបាំងកាយ F-35A, ឧទ្ធម្ភាគចក្រវាយប្រហារ AH-64 Apache, រថក្រោះ K2, គ្រាប់រ៉ុកកែត Chunmoo និងសព្វាវុធផ្សេងទៀត។ នេះបើតាមការបញ្ជាក់ពីក្រសួង។

នេះជាសមយុទ្ធបាញ់គ្រាប់ពិតរួមគ្នាលើកដំបូងរវាងប្រទេសទាំងពីរចាប់តាំងពីឆ្នាំ២០១៧មក ហើយនឹងធ្វើឡើងនៅទីលានហ្វឹកហាត់ Seungjin Fire Training Field ក្នុងទីក្រុង Pocheon ភាគឦសានទីក្រុងសេអ៊ូល។

សមយុទ្ធយោធានេះនឹងប្រារព្ធខួបលើកទី៧០នៃសម្ព័ន្ធភាពរវាងទីក្រុងសេអ៊ូល និងទីក្រុងវ៉ាស៊ីនតោន ដែលបានចាប់ផ្តើម៣ខែបន្ទាប់ពីបទឈប់បាញ់បញ្ចប់សង្គ្រាមកូរ៉េ នៅពេលប្រទេសទាំងពីរចុះហត្ថលេខាលើសន្ធិសញ្ញាការពារជាតិទៅវិញទៅមកក្នុងខែតុលាឆ្នាំ១៩៥៣។

សមយុទ្ធនេះក៏ប្រារព្ធខួបលើកទី ៧៥ នៃការបង្កើតយោធាកូរ៉េខាងត្បូងផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ ទីក្រុងព្យុងយ៉ាង ព្រមានថា សមយុទ្ធអាមេរិក-កូរ៉េខាងត្បូង ធ្វើឲ្យស្ថានការណ៍កាន់តែតានតឹង ឈានទៅរកសង្គ្រាមនុយក្លេអ៊ែរ