ខេត្តមួយនៅកាណាដា ប្រកាសអាសន្ន ដោយសារភ្លើងឆេះព្រៃ

កាលពីថ្ងៃសៅរ៍ទី៦ខែឧសភា ខេត្ត Alberta របស់ប្រទេសកាណាដា បានប្រកាសដាក់ក្នុងភាពអាសន្នបន្ទាប់ពី អ្នកខេត្តរាប់ម៉ឺននាក់ ត្រូវបានបង្ខំឲ្យជម្លៀសចេញពីផ្ទះរបស់ពួកគេ នៅពេលភ្លើងឆេះព្រៃមិនធ្លាប់មានពីមុនមក បានឆាបឆេះនៅទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមម៉ោង៦ល្ងាចថ្ងៃសៅរ៍ អ្នកខេត្ត Alberta ជាង ២៤០០០នាក់ ត្រូវបានជម្លៀសចេញពីផ្ទះ ខណៈមានភ្លើងឆេះព្រៃយ៉ាងសកម្មចំនួន១១០កន្លែងនៅទូទាំងខេត្ត ហើយក្នុងនោះ មាន៣៦កន្លែងមិនអាចគ្រប់គ្រងបាន។

លោកស្រី Christie Tucker អ្នកគ្រប់គ្រងអង្គភាពព័ត៌មានភ្លើងឆេះព្រៃខេត្ត Alberta បានលើកឡើងថា “វាជាថ្ងៃដ៏លំបាកបំផុតសម្រាប់អ្នកពន្លត់អគ្គិភ័យនៅទីនេះ។ យើង​កំពុង​ប្រយុទ្ធ​នឹង​ខ្យល់​បក់​ខ្លាំង អាកាសធាតុ​ក្តៅ ហើយ​ខ្យល់​ទាំងនោះ​បានធ្វើឲ្យ​ភ្លើង​ឆេះ​ព្រៃកាន់តែសកម្ម”។

ស្របពេលជាមួយគ្នានោះ ក្រុមហ៊ុន Whitecap Resources ដែលជាអ្នកផលិតប្រេងកំពុងប្រតិបត្តិការនៅភាគពាយព្យ និងកណ្តាលខេត្ត Alberta បាននិយាយថា ខ្លួនសូមធានាថា បុគ្គលិកទាំងអស់នឹងមានសុវត្ថិភាពតាមរយៈដំណើរការជម្លៀសចេញ ហើយទ្រព្យសម្បត្តិមិនរងផលប៉ះពាល់ទេ។

លោក Grant Fagerheim នាយកប្រតិបត្តិ Whitecap បានអះអាងកាលពីថ្ងៃសៅរ៍ថា “យើងកំពុងតាមដានយ៉ាងដិតដល់ ហើយអធិស្ឋានសុំទឹកភ្លៀង”៕

ប្រែសម្រួល៖ Vann Vann

ប្រភព៖ CNA

ចុចអាន៖ រលកកម្តៅសម្លាប់មនុស្សជាង ១០០០នាក់ទូទាំងទ្វីបអឺរ៉ុប ស្របពេលភ្លើងឆេះព្រៃ ក៏កំពុងវាយប្រហារខ្លាំងក្លា