មកដឹងប្រាក់ខែពលករ ឡាវ នៅកូរ៉េខាងត្បូង

យោងតាមក្រសួងការងារ និងសុខុមាលភាពសង្គមឡាវបានឲ្យដឹងថា បច្ចុប្បន្ននេះ មានជនជាតិឡាវជាង ២,៨០០ នាក់កំពុងធ្វើការនៅប្រទេសកូរ៉េខាងត្បូងលើកិច្ចសន្យារយៈពេលខ្លីពីឆ្នាំ ២០២២ ដល់ឆ្នាំ ២០២៣ ។

ពលករឡាវទាំងនោះត្រូវបានផ្តល់កិច្ចសន្យាដែលមានរយៈពេលពី ៥ ខែទៅ ១ ឆ្នាំជាមួយនឹងប្រាក់ឈ្នួលប្រចាំខែអប្បបរមាពី ១,៦០០ ដុល្លារដល់ ២,០០០ ដុល្លារ ហើយពួកគេក៏អាចមានសិទ្ធិទទួលបានអត្ថប្រយោជន៍សុខុមាលភាពសង្គមផងដែរ ។

ជារៀងរាល់ឆ្នាំ ជនជាតិឡាវប្រមាណ ៥០០ នាក់ត្រូវបានជ្រើសរើសឲ្យទៅធ្វើការនៅប្រទេសកូរ៉េខាងត្បូង បន្ទាប់ពីបានឆ្លងកាត់ការធ្វើតេស្តភាសាកូរ៉េដែលគ្រប់គ្រងដោយទីភ្នាក់ងារអភិវឌ្ឍន៍ធនធានមនុស្សនៃប្រទេសកូរ៉េខាងត្បូង ។

បើយោងតាមមន្ត្រីម្នាក់មកពីក្រសួងការងារ និងសុខុមាលភាពសង្គមឡាវបានប្រាប់សារព័ត៌មាន Vientiane Times ថា ប្រទេសកូរ៉េខាងត្បូងទទួលយកពលករវ័យក្មេងមកពីបណ្តាប្រទេសអាស៊ាននានា រួមទាំងឡាវផងដែរ ដើម្បីធ្វើការក្នុងសហគ្រាសធុនតូច និងមធ្យមក្នុងវិស័យកសិកម្ម វិស័យសេវាកម្ម និងឧស្សាហកម្មផ្សេងៗទៀតជាដើម ។

គិត​ត្រឹម​ឆ្នាំ​មុន ស្ថិតិ​របស់​ក្រសួង​ការងារ និង​សុខុមាលភាព​សង្គមឡាវ​បង្ហាញ​ថា មាន​ជនជាតិ​ឡាវ​ជាង ៥០​ ម៉ឺន​នាក់ កំពុង​ធ្វើ​ការ​នៅ​បរទេស ដោយសារតែបច្ចុប្បន្នប្រទេសនេះកំពុងប្រឈមមុខនឹងអតិផរណាខ្ពស់ ដែលនាំឲ្យមានការកើនឡើងគួរឲ្យកត់សម្គាល់នូវតម្លៃនៃការរស់នៅសម្រាប់ប្រជាពលរដ្ឋរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Laotian Times

ចុចអាន ៖ ប្រជាជន ថៃ សម្រុកប្រើអគ្គិសនីដល់កម្រិតមិនធ្លាប់មាន ព្រោះតែក្ដៅពេក