អាមេរិក-កូរ៉េខាងត្បូង ធ្វើសមយុទ្ធបាញ់គ្រាប់ពិតទ្រង់ទ្រាយធំ ជាប់ព្រំដែនកូរ៉េខាងជើង

កាលពីថ្ងៃព្រហស្បតិ៍ ទី២៥ ខែឧសភា យោធាកូរ៉េខាងត្បូង និងសហរដ្ឋអាមេរិក បានធ្វើសមយុទ្ធបាញ់គ្រាប់ពិតទ្រង់ទ្រាយធំ នៅជិតព្រំដែនជាប់ប្រទេសកូរ៉េខាងជើង ថ្វីបើទីក្រុងព្យុងយ៉ាងព្រមានថា ខ្លួននឹងមិនអត់ឱនចំពោះអ្វីដែលខ្លួនហៅថា ជាការហាត់សមដើម្បីឈ្លានពាននៅមាត់ទ្វាររបស់ខ្លួនក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាសមយុទ្ធបាញ់គ្រាប់ពិតលើកដំបូង ក្នុងចំណោមសមយុទ្ធបាញ់គ្រាប់ពិតចំនួន ៥ ដំណាក់កាល ដែលនឹងអូសបន្លាយដល់ពាក់កណ្តាលខែមិថុនា ហើយសមយុទ្ធនេះ ក៏សម្គាល់ជាខួប ៧០ ឆ្នាំ ចាប់តាំងពីការបង្កើតសម្ព័ន្ធភាពយោធារវាងទីក្រុងសេអ៊ូល និងវ៉ាស៊ីនតោនផងដែរ ។

យោងតាមក្រសួងការពារជាតិកូរ៉េខាងត្បូងបានឲ្យដឹងថា សមយុទ្ធនេះ ត្រូវបានធ្វើឡើងចំនួន ១១ ដងមកហើយ ចាប់តាំងពីចាប់ផ្តើមដំបូងនៅឆ្នាំ ១៩៨៨ ហើយសមយុទ្ធឆ្នាំនេះ មានការចូលរួមពីសំណាក់កងទ័ពចំនួន ២,៥០០ នាក់ និងប្រព័ន្ធសព្វាវុធចំនួន ៦១០ ដូចជាយន្តហោះចម្បាំង ឧទ្ធម្ភាគចក្រវាយប្រហារ យន្តហោះគ្មានមនុស្សបើក រថក្រោះ និងកាំភ្លើងធំពីកូរ៉េខាងត្បូង និងសហរដ្ឋអាមេរិក ។

ទោះបីជាយ៉ាងណាក៏ដោយ កូរ៉េ​ខាង​ជើង​មិន​បាន​ឆ្លើយ​តប​ភ្លាមៗ​ចំពោះ​ការធ្វើ​សមយុទ្ធនេះ​ទេ។ ប៉ុន្តែកាលពីថ្ងៃសុក្រសប្តាហ៍មុន ប្រព័ន្ធផ្សព្វផ្សាយរដ្ឋ បានហៅសមយុទ្ធនេះថាជា ការហាត់សមសម្រាប់ធ្វើសង្រ្គាមដែលផ្តោតលើកូរ៉េខាងជើង។

ទីភ្នាក់ងារសារព័ត៌មានកណ្តាលកូរ៉េខាងជើងផ្សាយថា សហរដ្ឋអាមេរិក និងកូរ៉េខាងត្បូងនឹងប្រឈមមុខផលវិបាកធ្ងន់ធ្ងរ ដោយសារតែសមយុទ្ធរបស់ពួកគេ។

គួរបញ្ជាក់ថា កាលពីដើមឆ្នាំនេះ យោធាកូរ៉េខាងត្បូង និងសហរដ្ឋអាមេរិកបានធ្វើសមយុទ្ធទ្រង់ទ្រាយធំបំផុតក្នុងរយៈពេល ៥ ឆ្នាំ។

សហរដ្ឋអាមេរិក ក៏បានបញ្ជូននាវាផ្ទុកយន្តហោះ USS Nimitz ដើរដោយថាមពលនុយក្លេអ៊ែរ និងយន្តហោះទម្លាក់គ្រាប់បែកដែលមានសមត្ថភាពនុយក្លេអ៊ែរ សម្រាប់ធ្វើសមយុទ្ធរួមគ្នាជាមួយកូរ៉េខាងត្បូងផងដែរ៕

ប្រែសម្រួល៖ Vann Vann

ប្រភព៖ Yahoo

ចុចអាន៖ កូរ៉េខាងត្បូង ចាប់ផ្តើមសមយុទ្ធទ័ពអាកាស ទ្រង់ទ្រាយធំ