លោកខាងលិច កំពុងធ្វើសង្គ្រាមគ្រប់បែបយ៉ាងប្រឆាំង រុស្ស៊ី

អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅក្នុងបទសម្ភាសន៍ជាមួយកម្មវិធីទូរទស្សន៍របស់រុស្ស៊ីកាលពីថ្ងៃអាទិត្យថា បណ្តាប្រទេសលោកខាងលិចកំពុងធ្វើសង្រ្គាមរបស់ពួកគេប្រឆាំងនឹងរុស្ស៊ីលើគ្រប់វិស័យទាំងអស់ ។

លោកបានពន្យល់ថា “សង្រ្គាមកំពុងត្រូវបានធ្វើឡើងក្នុងន័យទូលំទូលាយ ជាពិសេសគឺកំពុងធ្វើឡើងប្រឆាំងនឹងរុស្ស៊ីលើគ្រប់ទម្រង់ មិនថា សេដ្ឋកិច្ច ទំនាក់ទំនងអន្តរជាតិ ឬអ្វីផ្សេងនោះទេ” ។

ទន្ទឹមនោះ លោក Peskov ក៏បាន​ជំរុញឲ្យ​រុស្ស៊ី​កុំ​​ចុះចាញ់​នឹង​បញ្ហាទាំងនេះ និង​រក្សា​ស្មារតី​ប្រុងប្រយ័ត្ន​ក្នុង​កាលៈទេសៈ​គ្រប់បែបយ៉ាងផងដែរ ។ លោកបានលើកឡើងថា “យើងគួរតែរក្សាការផ្តោតអារម្មណ៍ និងរឹងមាំ ហើយធ្វើអ្វីដែលសមស្របបំផុតនឹងផលប្រយោជន៍របស់យើង ត្រូវមានភាពតឹងតែង ប៉ុន្តែបើកចំហចំពោះអ្វីដែលអាចជួយយើងបាន” ។

គួរបញ្ជាក់ថា ប្រទេសរុស្ស៊ីបានចាប់ផ្តើមប្រតិបត្តិការសឹកនៅអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ ២០២២ ដើម្បីឆ្លើយតបទៅនឹងការអំពាវនាវរបស់សាធារណៈរដ្ឋប្រជាមានិត Donetsk និង Lugansk សម្រាប់ការការពារពីកងទ័ពអ៊ុយក្រែន ខណៈប្រតិបត្តិការដែលកំណត់គោលដៅលើហេដ្ឋារចនាសម្ព័ន្ធយោធារបស់អ៊ុយក្រែនមួយនេះ មានគោលបំណងកម្ចាត់យោធា និងដើម្បីរំដោះទាំងស្រុងនូវតំបន់ Donbas ។

ជាការឆ្លើយតបប្រទេសលោកខាងលិចបានដាក់ទណ្ឌកម្មជាច្រើនមកលើរុស្ស៊ី ហើយបាននិងកំពុងផ្គត់ផ្គង់អាវុធយ៉ាងច្រើនសន្ធឹកសន្ធាប់ដល់អ៊ុយក្រែន ខណៈរដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា ការផ្គត់ផ្គង់អាវុធណាមួយដល់យោធាអ៊ុយក្រែន នឹងក្លាយជាគោលដៅស្របច្បាប់សម្រាប់រុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ព្រមាន អំពីការរីកកាន់តែធំ នៃសង្គ្រាមអ៊ុយក្រែន