ប្រទះឃើញត្រីបាឡែនចារកម្មរបស់ រុស្ស៊ី នៅឆ្នេរសមុទ្រ ស៊ុយអែត

ត្រីបាឡែនសមួយក្បាលដែលប្រទះឃើញនៅប្រទេសន័រវេសក្នុងឆ្នាំ ២០១៩ និងត្រូវបានគេចាត់ទុកថាជាភ្នាក់ងារចារកម្មដែលបង្ហាត់ដោយកងទ័ពជើងទឹករុស្ស៊ី បានបណ្ដែតខ្លួនឡើងសាជាថ្មីនៅឯឆ្នេរសមុទ្រនៃប្រទេសស៊ុយអែត ។

ត្រីបាឡែនដែលបំពាក់ទៅដោយឧបករណ៍កាមេរ៉ាដែលមានប្រភពមកពីទីក្រុង St Petersburg នៅលើដងខ្លួនរបស់វា មានឈ្មោះថា “Hvaldimir” និងបានបង្ហាញខ្លួនលើកជាលើកដំបូងនៅក្នុងតំបន់អាក់ទិកភាគខាងជើងនៃប្រទេសន័រវេស ។

ទន្ទឹមនោះ អ្នកជីវវិទូផ្នែកសមុទ្ររបស់ន័រវេសបានលើកឡើងថា ត្រីបាឡែនដែលត្រូវបានរកឃើញនៅតំបន់ Hunnebostrand នៃឆ្នេរភាគនិរតីប្រទេសស៊ុយអែត ប្រហែលជាហែលចេញពីតំបន់ព័ទ្ធជុំវិញនោះ ជាពិសេសដោយសារតែវាដល់រដូវបង្កាត់ពូជផង ។

ពាក់ព័ន្ធនឹងការរកឃើញនេះដែរ ទីក្រុងមូស្គូមិនដែលចេញប្រតិកម្មជាផ្លូវការណាមួយចំពោះអះអាងរបស់របស់ន័រវេសដែលថា ត្រីបាឡែនសនេះជា “ចារកម្មរុស្ស៊ី” នោះទេ ។

គួរបញ្ជាក់ថា ត្រីបាឡែនសដែលអាចមានប្រវែងដល់ទៅ ៦ ម៉ែត្រ និងរស់នៅចន្លោះពី ៤០ ទៅ ៦០ ឆ្នាំមួយក្បាលនេះ ជាទូទៅរស់នៅក្នុងដែនទឹកកកជុំវិញតំបន់ Greenland ភាគខាងជើងប្រទេសន័រវេស និងប្រទេសរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ទីបំផុត រុស្ស៊ី ដកខ្លួនចេញពីសន្ធិសញ្ញាគ្រប់គ្រងអាវុធរបស់ អឺរ៉ុប ជាមួយ ណាតូ