ចិន បញ្ជូនអវកាសយានិកជាជនស៊ីវិលលើកដំបូងទៅកាន់ស្ថានីយអវកាស

ចិនបានបញ្ជូនអវកាសយានិកចំនួន ៣ នាក់ទៅកាន់គន្លងតារាវិថីនៅក្នុងបេសកកម្មបាញ់បង្ហោះយាន Shenzhou-16 ទៅកាន់ស្ថានីយអវកាសរបស់ខ្លួនដើម្បីជាការប្ដូរវេនស្នាក់នៅ ហើយវាក៏ជាជំហានឆ្ពោះទៅមុខមួយទៀតសម្រាប់កម្មវិធីអវកាសដែលគ្រោងហោះទៅជាន់ដីឋានព្រះចន្ទនៅឆ្នាំ ២០៣០ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អវកាសយានិកនៃយាន Shenzhou-16 ចំនួន ៣ នាក់បានហោះចេញពីមជ្ឈមណ្ឌលបាញ់បង្ហោះផ្កាយរណប Jiuquan នៅវាលខ្សាច់នៃខេត្ត Gansu របស់ប្រទេសចិន នៅព្រឹកថ្ងៃអង្គារនេះ ដើម្បីឆ្ពោះទៅកាន់ស្ថានីយអវកាស Tiangong ។

ក្នុងចំណោមនាវិកទាំង ៣ នាក់នោះ មានម្នាក់គឺជាជនស៊ីវិល ហើយវាក៏ជាលើកដំបូងផងដែរដែលមានជនស៊ីវិលចូលរួមក្នុងបេសកកម្មហោះចូលទៅស្ថានីយអវកាសរបស់ចិន ហើយពួកគេនឹងស្នាក់នៅរយៈពេល ៥ ខែ ដើម្បីជំនួសអវកាសយានិកដែលបានបញ្ចប់បេសកកម្មនៅទីនោះ ។

ដោយឡែក​ចំពោះមហិច្ឆតា​ដែលចិនមានបំណងបញ្ជូនអាវកាសយានិក​របស់ខ្លួនទៅជាន់ដីនៅឋានព្រះចន្ទជាលើកដំបូងនៅក្នុងឆ្នាំ ២០៣០ នោះ, លោក Lin Xiqiang នាយករងនៃទីភ្នាក់ងារអវកាសចិននិយាយថា យើងមានគោលដៅរួមរួចហើយ ហើយយើងក៏នឹងបង្កើតប្រព័ន្ធរស់នៅក្នុងរយៈពេលខ្លីសម្រាប់នាវិក ដើម្បីធ្វើការស្រាវជ្រាវសំណាកផ្សេងៗលើផ្ទៃនៃឋានព្រះចន្ទផងដែរ ។

បន្ថែមពីលើការបាញ់បង្ហោះយាន Shenzhou-16 នេះដែរ ចិនក៏បានបាញ់បង្ហោះយានដឹកទំនិញ Tianzhou-6 មួយទៀតកាលពីដើមខែនេះ ហើយត្រៀមនឹងបាញ់បង្ហោះយានអវកាស Shenzhou-17 នៅចុងឆ្នាំនេះផងដែរ ។

គួរឲ្យដឹងថា ចិនបានជំរុញសមត្ថភាពរបស់ខ្លួនកាន់តែឆាប់រហ័ស​ទៅលើ​កម្មវិធីអវកាស ដើម្បីប្រកួតប្រជែងជាមួយ​ប្រទេសផ្សេងៗ ជាពិសេស​ អាមេរិក និងរុស្ស៊ី ខណៈកាលពីឆ្នាំមុន ចិនក៏ទើបតែបានបញ្ចប់ការសាងសង់យ៉ាងជោគជ័យលើស្ថានីយ៍អវកាស Tiangong ផងដែរ ៕

ប្រែសម្រួល ៖ នាង រតនៈ

ប្រភព ៖ CNN

ចុចអាន ៖ ចិន ផលិតវ៉ាក់សាំងថ្មីច្រើនប្រភេទ ខណៈករណីឆ្លងកូវីដ ផ្ទុះឡើងខ្លាំង