លោក Medvedev៖ អង់គ្លេស កំពុងធ្វើសង្គ្រាមជាមួយ រុស្ស៊ី

អតីតប្រធានាធិបតីរុស្ស៊ី លោក Dmitry Medvedev បានចាត់ទុកចក្រភពអង់គ្លេសថា កំពុងធ្វើសង្គ្រាមទាំងមិនប្រកាស ប្រឆាំងនឹងប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការ​អត្ថាធិប្បាយ​នេះ ​ធ្វើ​ឡើង​បន្ទាប់​ពី​រដ្ឋមន្ត្រី​ការ​បរទេស​អង់គ្លេស ​បាន​ចូលរួម​រំលែក​ទុក្ខ​ចំពោះ​ការ​វាយ​ប្រហារ​ដោយ​យន្តហោះ​គ្មាន​មនុស្ស​បើក​ទ្រង់ទ្រាយ​ធំ ​លើ​ក្រុង​មូស្គូ​កាល​ពី​ដើម​សប្តាហ៍​នេះ។

នៅក្នុងការបង្ហោះ Twitter កាលពីថ្ងៃពុធទី៣១ខែឧសភា លោក Medvedev បានចោទប្រកាន់ទីក្រុងឡុងដ៍ថា ជា “សត្រូវអស់កល្បរបស់ទីក្រុងមូស្គូ”។ អតីតមេដឹកនាំ ដែលបច្ចុប្បន្នជាអនុប្រធានក្រុមប្រឹក្សាសន្តិសុខរបស់រុស្ស៊ីរូបនេះ បានអះអាងថា ផ្អែកលើច្បាប់អន្តរជាតិ រួមទាំងអនុសញ្ញាទីក្រុងឡាអេ និងហ្សឺណែវ ផងដែរនោះ, អង់គ្លេស ក៏អាចមានលក្ខណៈគ្រប់គ្រាន់ក្នុងការធ្វើសង្រ្គាមដែរ។

អតីតប្រធានាធិបតីរូបនេះ អះអាងថា តាមរយៈការផ្តល់អាវុធ និងការហ្វឹកហ្វឺនដល់អ៊ុយក្រែន, ចក្រភពអង់គ្លេស កំពុងដឹកនាំសង្រ្គាមដែលមិនបានប្រកាសប្រឆាំងនឹងរុស្ស៊ី។ លោកបន្ថែមថា នេះ​អាច​មាន​ផល​ប៉ះពាល់​ដោយ​ផ្ទាល់​ដល់មន្ត្រី​សាធារណៈ នៅក្នុងចក្រភពអង់គ្លេស។

ទន្ទឹមនោះ ការបង្ហោះលើ Twitter របស់លោក​ Medvedev ក៏បានកើតឡើង ដោយសារតែរដ្ឋមន្ត្រីការបរទេសចក្រភពអង់គ្លេសលោក James Cleverly បាននិយាយថា អ៊ុយក្រែនមានសិទ្ធិប្រើកម្លាំងហួសពីព្រំដែនរបស់ខ្លួន ដើម្បីបំផ្លាញសមត្ថភាពរបស់រុស្ស៊ី។

លោក Cleverly អះអាងទៀតថា ការវាយប្រហារគោលដៅយោធាស្របច្បាប់នៅក្នុងប្រទេសរុស្ស៊ី គឺជាផ្នែកដែលអាចទទួលយកបាន នៃការការពារស្វ័យភាពរបស់អ៊ុយក្រែន។

យោងតាមក្រសួងការពារជាតិរុស្ស៊ី យន្តហោះដ្រូន ចំនួនប្រាំបីគ្រឿង ត្រូវបានគេឃើញនៅក្នុងដែនអាកាសរបស់ទីក្រុងមូស្គូ នៅក្នុងអ្វីដែលក្រុមមន្ត្រីពណ៌នាថាជា “ការវាយប្រហារភេរវកម្ម” ដោយទីក្រុងកៀវ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Medvedev ថា ៨០ ឆ្នាំមកនេះ រុស្ស៊ី ជួបពិភពសត្រូវគ្រប់បែបយ៉ាង