កាណាដា ប្រកាសផ្តល់ជំនួយថ្មីឲ្យអ៊ុយក្រែន មានទាំងមីស៊ីលស៊េរីទំនើប

កាលពីថ្ងៃសៅរ៍ទី១០ខែមិថុនា នាយករដ្ឋមន្ត្រីកាណាដា លោក ចាស្ទីន ទ្រូដូ បានធ្វើដំណើរដ៏ភ្ញាក់ផ្អើល ទៅកាន់រដ្ឋធានីកៀវ ដោយសន្យាថា នឹងផ្តល់ជំនួយផ្នែកយោធា និងមនុស្សធម៌បន្ថែម ដល់ប្រទេសអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទ្រូដូ និយាយថា ប្រទេសកាណាដា នឹងគាំទ្រអ៊ុយក្រែនតាមដែលអាចធ្វើទៅបាន ហើយសន្យាថា នឹងផ្តល់ជំនួយយោធាថ្មីក្នុងទំហំទឹកប្រាក់ ៣៧៥លានដុល្លារអាមេរិក។

ទន្ទឹមនឹងជំនួយហិរញ្ញវត្ថុ លោក ទ្រូដូ និយាយថា ប្រទេសរបស់លោក ក៏នឹងផ្តល់មីស៊ីលដែលមានសមត្ថភាពបាញ់ចំគោលដៅច្បាស់ៗស៊េរីទំនើប ដល់កងកម្លាំងអ៊ុយក្រែន ផងដែរ។

លើសពីនេះ លោកទ្រូដូ ថែមទាំងប្រកាសផ្តល់ជំនួយមនុស្សធម៌ក្នុងទំហំទឹកប្រាក់ចំនួន ៧.៥លានដុល្លារអាមេរិកទៀតផង ដើម្បីឆ្លើយតបទៅនឹងទឹកជំនន់ បណ្តាលមកពីការបាក់ទំនប់។

សេចក្តីប្រកាសរបស់នាយករដ្ឋមន្ត្រីកាណាដា កើតឡើងខណៈប្រធានាធិបតីអ៊ុយក្រែនលោក​ វ្ល៉ាឌីមៀរ ហ្សេលេនស្គី បញ្ជាក់ថា ប្រតិបត្តិការវាយបកទៅរុស្ស៊ី បានចាប់ផ្តើមរួចហើយ។

លោក ហ្សេលេនស្គី និយាយថា សកម្មភាពវាយបក និងការពារប្រឆាំងកងកម្លាំងរុស្ស៊ីកំពុងដំណើរការ ប៉ុន្តែលោកបានបដិសេធផ្តល់ព័ត៌មានលម្អិត។ លោកមិនបាន​បញ្ជាក់​ថា តើកងទ័ព អ៊ុយក្រែន កំពុងស្ថិត​ក្នុង​ដំណាក់​កាល​ណា​នោះ​ទេ៕

ប្រែសម្រួល៖ Vann Vann

ប្រភព៖ NHK

ចុចអាន៖ កាណាដា ឲ្យ អ៊ុយក្រែន ខ្ចីលុយទិញឥន្ធនៈទុកកម្ដៅនៅរដូវរងា